web counter
LEXO PA REKLAMA!

SHKARKO APP

App Store
Google Play

E fundit!

x

SPAK-u sekuestron hotelin luksoz me 5 yje të Redi Mollës

9 Korrik 2024, 11:03, Aktualitet CNA
SPAK-u sekuestron hotelin luksoz me 5 yje të Redi Mollës
Redi Molla

Gjykata e Posaçme, me kërkesë të SPAK-ut, ka sekuestruar disa nga pasuritë e Redi Mollës, ish-drejtor i UKT-së në Tiranë, i arrestuar pak muaj më parë pas hetimeve të dosjes "5D" për skandalin me tenderët. 

SPAK-u njofton se ka sekuestruar shoqërinë tregtare “Restur” si dhe 24% të kuotave në shoqërinë tregtare “Mediterranean Investment Group” sh.p.k., me seli në Durrës, të Redi Mollës. 

"Shoqëria tregtare 'Restur' sh.p.k., së bashku me pasuritë e paluajtshme dhe të luajtshme në pronësi të saj, në zotërim të shtetasit R.M., si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal. Pasuria 24 % e kuotave në shoqërinë tregtare 'Mediterranean Investment Group' sh.p.k., me seli në Durrës, regjistruar në emër të shoqërisë tregtare 'Restur' sh.p.k., me ortak dhe administrator R.M., si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal", thuhet në njoftimin e SPAK-ut. 

Si nisi procesi për ndërtimin e hotelit luksoz në Durrës?

Më 6 tetor 2021, ministrja e Mjedisit dhe Turizmit, Mirela Kumbaro, deklaroi dhënien e statusit special për ndërtimin e një hoteli me 5 yje në Durrës në favor të kompanisë “Mediterranean Investment Group”.

Bëhet fjalë për një investim prej 15 milionë eurosh. 

Kompania që përfitoi heqjen e taksave përmes statusit special ishte e lidhur me ish-drejtorin e Ujësjellësit të Tiranës, i cili akuzohet nga SPAK-u për veprat penale të korrupsionit dhe fshehjes së pasurisë.

Kompania “Mediterranean Investment Group” u themelua në shtator të vitit 2020 dhe njëri prej aksionerëve me 24% ishte Selim Molla, babai i ndjerë i Redi Mollës, i cili ia trashëgoi aksionet të birit në shkurt 2024.

Në kohën kur kompania me aksioner babanë e tij mori statusin e veçantë të “Investitorit në strukturë akomoduese me 5 yje, status special”, Molla ishte administrator i "Tirana DC", një ndërmarrje me aksionere 100 për qind Bashkinë e Tiranës, të cilën e drejtoi deri në vitin 2023.  

Pra, Redi Molla ka mundur të përfitojë këtë projekt të madh që kushton miliona euro./CNA

 





Lajmet e fundit nga