Problem me zemrën apo helmim?/ Gazetari: Ja çfarë ndodhi me të penduarin e drejtësisë, Nuredin Dumani

8 Shtator 2025, 09:57, Aktualitet CNA

Problem me zemrën apo helmim?/ Gazetari: Ja çfarë ndodhi me

I penduari i drejtësisë, Nuredin Dumani, u shtrua gjatë fundjavës në reanimacionin e QSUT-së, ku qëndroi deri të dielën pasdite. Një sërë dyshimesh u ngritën për këtë ngjarje, nga dyshimet për probleme shëndetësore, deri te helmimi.

Një një dalje televizive në "A2CNN", gazetari Andi Bora ndau detaje lidhur me situatën e dy ditëve më parë.

Sipas informacioneve, rezulton se Dumani ka pasur probleme me zemrën, por deri më tani nuk hidhet poshtë pista e përkeqësimit të shëndetit për shkak të ushqimeve që mund të ketë konsumuar.

Gazetari shprehu dyshimin për një tentativë eliminimi, duke përmendur edhe rastin e një tjetër të penduari, Luftar Reçin, ndaj të cilit ka pasur disa tentativa helmimi.

“Nuredin Dumani një person që ka mbi supe një sërë vrasjesh, mund t’i ndodhë dhe është krejt normale, një figurë që mban mbi supe kaq shumë vrasje. Është e mundur se në burgje familjarët sjellin ushqim. Di që ka pasur një aritmi, është dërguar me urgjencë në spital dhe i siguruar me forca policie. Ka qenë në reanimacion, janë kryer analizat. Ka pranuar që ka pasur dy ndërhyrje në zemër kohë më parë. Për të penduarin tjetër të drejtësisë, Luftar Reçin, disa herë është tentuar helmimi i tij në burg. E vërteta duhet të dalë nga analizat nëse ka pasur toksinë brenda. Do të duhet hetuar kush e ka sjellë ushqimin, nëse mund të kemi tentativë për helmim. Por nuk e besoj, të gjithëve na ndodh të helmohemi nga ushqimet. Jam i bindur që kontrolli ushqimor ndaj tij duhet të jetë i lartë se ai ka ende për të rrëfyer. Ai ka rrëfyer vetëm një pjesë të gjërave. Mënyra si duhet të trajtohet nga aspekti i sigurisë duhet të jetë i lartë. Dje pasdite la reanimacionin nën masa të rrepta sigurie. Nuk dihet nëse është kthyer në qeli. Situata të lë të dyshosh, por nuk besoj se do të ishte momenti pas intervistës për eliminimin e tij”,- tha Bora./CNA