"Nëse hetimet vijojnë zvarriten, mund të kemi kosto"/ Shehaj: Dritan Prençi mbron inceneratorin e Tiranës

2 Shtator 2025, 19:59, Aktualitet CNA

"Nëse hetimet vijojnë zvarriten, mund të kemi kosto"/

Ekspertja e ekonomisë, Brisida Shehaj e ftuar në Syri Tv ka folur për krijimin e Agjencisë për Menaxhimin e Mbetjeve.

Shehaj tha se kjo agjenci duhet të marrë nën administrim të gjithë oinceneratorët. Mes tyre tha Shehaj duhet marë nën administrim dhe Tirana, por në Tiranë nuk ka se çfarë të marrë nën administrim.

Sa i përket inceneratorit të Tiranës, Shehaj tha se po mbrohet nga prokurori Dritan Prençi.

Nëse nuk do të mbrohej, u shpreh Shehaj, do të ishin gjetur paratë dhe do të ishin hetuar apartamentet që janë dhënë në këmbim të aferës me dherat.

Më tej, ekspertja deklaroi se zvarritja e hetimeve mund të sjellë dhe kosto financiare, pas Mirel Mërtiri apo të tjerë mund ta çojnë çështjen në Strasburg dhe të thonë se u është penguar puna.

Po ashtu Shehaj foli dhe për krijimin e agjencive shtetërore, për të cilat tha se ende nuk dihet se për çfarë po bëhen dhe ku do të shkohet me këto agjenci.

“Qendërzimi në duar nuk ka për të prodhuar asgjë të mirë nëse nuk ndryshon mentaliteti i kësaj qeverie. Krijimi i kësaj drejtorie duhet të marrë në administrim të gjitha këto që janë. Fieri ka nevojë të paktën për 4-5 milionë euro investime të tjera. Duhet të marrë në administrim dhe Tiranën, por në Tiranë s’ka çfarë të marrë. Inceneratori i Tiranës nuk kryen veprime dhe del me fitim.

Për sa kohë janë vepra që shteti i njeh, agjencia e re ka për detyrim t’i marrë nën administrim. Agjencia do marrë paratë e gjithë bashkive dhe do administrojë me ato para, por mund të marrë para dhe nga buxheti i shtetit. Dritan Prençi mbron inceneratorin e Tiranës, se po të ishte ndryshe do ishin gjetur paratë, do ishin hetuar kullat e Tiranës. Depozito dherat dhe na jep apartamente.

Nëse hetimet vazhdojnë të zvarriten, në një moment do ngrihet Mirel Mërtiri apo ata prestanomet e tjerë të na çojnë në Strasburg, e të thonë ne do e bënim, por na ndaluan. Kanë ekskluzivitetin. Nëse ndërhyn ligji të marrë në administrim landfillet, mund të kemi dhe kosto financiare. Nëse do të krijohet një agjenci për menaxhimin e mbetjeve, patjetër do të marrë nën administrim dhe landfillet, që të bëhet trajtimi i mbetjeve. Rama u bë disa kohë që flet për kompani shtetërore. Nuk e dimë për çfarë po i bën dhe ku do të shkojmë, do ta shohim rrugës”, tha Shehaj./ CNA