web counter
LEXO PA REKLAMA!

SHKARKO APP

App Store
Google Play

E fundit!

x

Magazinat plot në juglindje/ Tregu bosh për prodhimin vendas

30 Janar 2026, 14:49, Aktualitet CNA


Magazinat e fermerëve të juglindjes edhe këtë vit janë të mbushura me produkte bujqësore të pashitura, duke përsëritur të njëjtën situatë si një vit më parë.

Sasi të mëdha patatesh kanë mbetur stok dhe tashmë kanë nisur të dëmtohen, duke rrezikuar të kalben plotësisht.

Fermeri i ri, Ledion Kreka, i cili prej vitesh punon së bashku me prindërit e tij në kultivimin e patates, shprehet se dëmi ekonomik për familjen e tij këtë sezon arrin në rreth 60 milionë lekë.

Sipas tij, asnjëherë nuk kanë përfituar kompensim për humbjet, ndërsa fajëson importet që po dominojnë tregun vendas.

Kreka thekson se patatja e kultivuar në Orman është disa herë më cilësore se ajo e importuar, ndërsa subvencionet që ofrohen i cilëson të pamjaftueshme dhe formale.

Edhe Durim Kreka tregon se këtë vit ka kultivuar patate, por pavarësisht çmimit të shitjes që varion nga 20 deri në 25 lekë për kilogram, mungojnë tregtarët që ta blejnë prodhimin.

Ai shton se dëmi është i konsiderueshëm dhe se, pavarësisht moshës, vazhdon të merret me bujqësi për të siguruar jetesën.

Në të njëjtën situatë ndodhet edhe Izareti, fermer nga Ormani, i cili këtë vit ka mbjellë patate dhe qepë, por deri më tani nuk ka arritur të shesë asnjë sasi. Sipas tij, nëse prodhimi nuk nxirret në treg para muajit shkurt, rrezikon të prishet në magazina.

Bardhi Zhuleku, fermer nga fshati Tren i Devollit, shprehet se fermerët nuk kompensohen nga shteti as në rastet kur prodhimi u dëmtohet nga faktorët natyrorë, duke i lënë të përballen të vetëm me pasojat financiare.

Stoku i patates këtë vit rezulton veçanërisht i lartë në magazinat e fermerëve të Maliqit, ndërsa shpresa për shitje apo kompensim mbetet e pakët, duke e bërë të pasigurt vazhdimësinë e punës në bujqësi për shumë familje fermere./ CNA





Lajmet e fundit nga