E fundit!

16:34 Aktualitet

"Vetëm një ndalesë në pikat doganore"/ Nënshkruhet marrëveshja mes Shqipërisë dhe Maqedonisë së Veriut

Shqipëria dhe Maqedonia e Veriut kanë arritur një marrëves...

Kreu i KMSH-së, urim për Fitër Bajramin/ “T’u gjendemi pranë njerëzve në nevojë”

9 Prill 2024, 20:35, Aktualitet CNA

Kreu i KMSH-së, urim për Fitër Bajramin/ “T’u

Kreu i Komunitetit Mysliman, Bujar Spahiu

Besimtarët myslimanë këtë të mërkurë do të festojnë Fitër Bajramin.

Kreu i Komunitetit Mysliman, Bujar Spahiu uron dhe i fton besimtarët që t’i mbartin vlerat që kanë pasur gjatë muajit të shenjtë të Ramazanit.

Sipas kreut të KMSH-së, jo vetëm shtresat në nevojë, por edhe të rinjtë duhet të jenë në vëmendjen tonë.

Spahiu bën lutje për agjërim të pranuar, për shëndet, paqe dhe begati.

Një lutje ai bën edhe për fëmijët dhe familjet që po përballen me luftëra në Gaza, Ukrainë e kudo.

Mesazhi i plotë:

Gëzuar Fitër Bajramin të gjithë besimtarëve dhe shqiptarëve kudo që ndodhen!

Të dashur motra dhe vëllezër!

Ashtu si çdo gjë që ka një fillim dhe një fund, përveç Zotit, i Cili është i pafillim e i pafund, sakrificës tonë shpirtërore dhe fizike të këtij muaji të begatë i erdhi fundi.

Për një muaj kemi agjëruar me besimin dhe shpresën e fitimit të kënaqësisë së Zotit.

Zoti i gjithësisë qoftë i kënaqur me ne dhe na e pastë pranuar agjërimin, lutjet dhe të gjitha adhurimet gjatë këtij muaji të bekuar, të cilin po e përcjellim sot.

Nesër kemi festë, kemi Fitër Bajram!

Fitër Bajrami është festa e përmbylljes me sukses, me lejen e Zotit, të një rrugëtimi të përsosjes shpirtërore.

Bajrami është lumturia që ne ndiejmë me plotësimin e agjërimit të Ramazanit si dhe falenderimi ndaj Zotit për mirësitë që na ka begatuar.

Profeti Muhamed (a.s.) ka thënë: “Kush agjëron Ramazanin me besim dhe duke qenë i bindur në shpërblimin e Zotit, atij i falen të gjitha gjynahet e kaluara.”

E lusim Zotin të na ketë falur të gjitha mëkatet, ashtu siç Ai na ka premtuar.

E lusim Zotin për të sëmurët, që t’u jap shëndet.

E lusim Zotin për rininë tonë, që ta udhëzojë atë.

E lusim Zotin për prindërit, të moshuarit e çdo njeri në nevojë, që t’ia largojë brengat dhe vuajtjet.

E lusim Zotin që vendi ynë, Shqipëria, të bëhet një vend më i mirë, më i begatë e më shpresëdhënës për shqiptarët.

E lusim Zotin që luftërat që po marrin jetë civilësh e fëmijësh në Gaza, Ukrainë e kudo, të marrin fund sa më parë.

Motra dhe vëllezër, ngrohtësia e Bajramit le të sjellë lumturi dhe të mbushë jetën tuaj me gëzim dhe hare.

Zoti i Madhëruar ju bekoftë sot, nesër dhe gjithmonë.

Paçi një Bajram të begatë!

Gëzuar!/ CNA