web counter
LEXO PA REKLAMA!

SHKARKO APP

E fundit!

x

Incidenti në ujërat territoriale shqiptare/ Ministria: Ndërhyrje për garantimin e sigurisë në hapësirën detare

25 Maj 2025, 21:46, Aktualitet CNA

Incidenti në ujërat territoriale shqiptare/ Ministria: Ndërhyrje

Ministria e Mbrojtjes ka ndarë detaje nga shpëtimi i dy turistëve të huaj që mbetën në det të hapur pas një avarie në mjetin e tyre lundrues.

Sipas njoftimit, gjatë ditës së sotme, Qendra Kombëtare e Kërkim-Shpëtimit (QKKSH) u njoftua nga autoritetet greke (JJRC PIRE) për një incident në ujërat territoriale shqiptare, ku një veliere me dy shtetas të huaj në bord, një gjerman dhe një zviceran, kishte pësuar defekt në motor dhe kishte mbetur në det të hapur, në pozicionin rreth 5 milje larg Gjirit të Gramës.

Menjëherë pas marrjes së njoftimit, u organizua ndërhyrja nga mjeti i Policisë Kufitare të Stacionit Dhërmi dhe anija patrulluese P133 LISUS e Forcës Detare. Njëkohësisht, patrulla tokësore e Policisë Kufitare mbajti nën vëzhgim vizual velieren nga bregu.

Falë koordinimit të strukturave operacionale dhe pavarësisht dallgëve të detit, situata u menaxhua me efikasitet. Ekuipazhi i velierës “INRESCENT” arriti të rivinte në funksion motorin, dhe nën mbikëqyrjen e mjeteve detare shqiptare, mjeti lundrues u shoqërua në mënyrë të sigurt drejt Gjirit të Porto Palermos, ku do të vijohen procedurat përkatëse.

Dy shtetasit e huaj ndodhen në gjendje të mirë shëndetësore.

Ky operacion është cilësuar si bashkëpunim efektiv ndërinstitucional mes Policisë Kufitare, Rojës Bregdetare dhe Qendrës Kombëtare të Kërkim-Shpëtimit, në garantimin e sigurisë në hapësirën detare shqiptare./CNA

 





Lajmet e fundit nga