Fakti/ Zbulohet shërbimi i Lulzim Bashës ndaj inceneratorëve

28 Janar 2022, 12:09, Politikë CNA

Një lojë politike, por më shumë një lojë korruptive e Lulzim Bashës dhe të tijve, në lidhje me aferën e shekullit, atë të inceneratorëve.

Basha pretendon se ish-ministri i Ramës, Lefter Koka u arrestua për shkak të denoncimit të tij. Basha pretendon se Opozita ka denoncuar inceneratorët.

Së pari, pretendohet se Lulzim Basha ka denoncuar inceneratorët në vitin 2020 dhe në atë vit bëri edhe disa konferenca shtypi.

Në fakt foli disa javë pasi mori dokumentat nga mediat, të cilat ishin publikuar nga viti 2015 e në vazhdim.

Inceneratori i Elbasanit fillimisht është denoncuar nga BIRN, më pas ka qënë CNA.al, TPZ dhe disa media të tjera, që kanë folur.

Por, kishte dhe nga ato që heshtën dhe më pas u zbulua se paguheshin nga inceneratorët. Siç janë mediat e mëdha, Top Channel, News 24, Report tv, dhe disa portale të Baton Haxhiut dhe njerëzve afër kryeministrit Rama.(Lexo këtu)

Pra, nga 2015 që folën mediat, deri në 2020, Lulzim Bashës i duheshin pesë vite që të bënte disa konferenca shtypi dhe të çonte dosjen në SPAK.

Një dosje e cila në fakt nuk është e para e çuar për inceneratorët.

Por, ka qënë Nisma THURJE, e cila ka çuar kallëzimin e parë në SPAK.

Nga ana tjetër, Arben Kraja, kreu i SPAK dhe prokurorët thanë se e kanë bërë këtë arrestim pas denoncimit të PD-së.

Denoncuesit e parë kanë qënë mediat dhe Nisma THURJE, dhe jo Lulzim Basha.

Lulzim Basha foli pasi pa se gjithçka po fryhej.

Në 2017 kishte ndodhur kontrata koncesionare e inceneratorit të Tiranës. Sërish Lulzim Basha u kujtua të fliste në 2020, tre vite më vonë.

Pra, për pretendimin e Lulit se ai foli dhe e denoncoi, një opozitë që flet tre vite me vonesë, pesë vite me vonesë, pak para zgjedhjeve, me justifikimin se ?tani është fushata elektorale, skemi çtë bëjmë?. Këto janë fjalët që janë thënë njerëzve që kanë negociuar mes Bashës dhe kompanive të inceneratorëve.

Më tej, ka argumente të tjera.

Disa denoncime dhe më pas heshtje. Jo e gjithë PD-ja fliste. Tek-tuk, Jorida Tabaku, e cila së fundi është përdorur nga Lulzim Basha për të mbyllur dhe ?kapsuluar? një herë e mirë dosjen e inceneratorëve, ashtu siç kapsulohen mbetjet në landfillin e Sharrës, apo ato që u kapsuluan në vendgrumbullimin e mbetjeve në Elbasan.

PD-ja në mënyrë të turpshme kërkon një Komision Hetimor, ndërkohë që SPAK kishte hapur hetimet. Opozita mund të vazhdonte të fliste në konferenca shtypi ditë pas dite, dhe të detyronte SPAK-un të reagonte. Por në muajin tetor të vitit të kaluar, kërkoi një Komision Hetimor. Kjo erdhi menjëherë pas përjashtimit të ish-kryeministrit Berisha nga Partia Demokratike dhe grupi parlamentar.

Për të tërhequr vëmendjen, Lulzim Basha hodhi inceneratorët në lojë. Kërkoi një Komision Hetimor, të cilin Edi Rama ia miratoi në muajin tetor.

Por, sipas ligjit dhe Rregullores së Kuvendit, Komisioni ka afat tre muaj. Filloi në muajin tetor dhe mbaroi sot.

Afati ligjor ka mbaruar në ditën e sotme. Nuk ka më ditë për Komisionin Hetimor, i drejtuar nga Jorida Tabaku.

Kuptohet gjithçka ka qënë një skemë. U deshën disa ditë të konstituohej Komisioni. Pastaj disa ditë të tjera të diskutohej Rregullorja. Më pas u afrua Dhjetori, do të çoheshin pyetje dhe kërkesa për informacion nëpër institucione, të cilat donin afatet e tyre.

Në fakt shumë dokumenta ishin publike. Mjafton që të bëhej konfirmimi i tyre. Mund të kërkoheshin dokumenta në Kontrollin e Lartë të Shtetit, i cili kishte nxjerrë disa raporte mjaft të forta.

Nga ana tjetër, Jorida kërkoi t?i mblidhte dokumentet nga e para nëpër banka që nuk përgjigjeshin, nëpër institucione publike që flisnin për të dhëna personale, e të tjera si këto.

Në fakt, mjafton që anëtarët e Komisionit të kishin çertifikatë sigurie dhe të gjitha të dhënat mund të merreshin dhe të përdoreshin. Por, Jorida nuk e bëri këtë. Nga fillimi I Dhjetorit ajo e pushoi Komsionin Hetimor, deri në mesin e muajit Janar, duke ngritur shkresa, me pretendimin se do të vinin përgjigjet dhe gjithçka do të ishte gati në tavolinë.

Pra, socialistët, Qeveria, institucionet që kishin ?gatuar? inceneratorët, një aferë 178 milionë euro koncesione dhe rreth 430 milionë euro në vlerë totale, do t?i kthenin letrat në tavolinë gati, siç i donte Jorida. Apo kjo ishte një lojë?

A thua se Jorida Tabaku dhe Lulzim Basha nuk e dinin këtë?

Dhe kështu, ndodhi. Pas kalimit të Vitit të Ri, në mes të muajit Janar, kur Jorida kishte kaluar gati 40 ditë nga ditët e plota të afatit prej 90 ditësh që ka Komisioni Hetimor Parlamentar, filloi të kërkonte të bënte investigime, të shtynte afatet e të tjera si këto.

Në fakt, socialistët nuk e pranuan. Skenari eci shumë i rregullt, dhe gjithçka u mbyll.

Lulzim Basha dhe Jorida Tabaku, thjeshtë i shërbyen inceneratorëve, aferës së shekullit. Hapën një dosje për ta investiguar dhe e lanë të hapur. Apo e morën dhe e ?groposën? me gjithë shkresat e pavlera që kanë mbledhur, pasi shumë institucione nuk kanë kthyer as përgjigje.

Megjithëse shumë prej atyre institucioneve duheshin çuar në ndjekje penale. Drejtuesit e tyre duheshin çuar në kallëzim për shkelje të ligjit. Pa folur më tej, se Komisioni vetë, anëtarët e tij, të paktën duhet të kishin pasur kurajo të dilnin nga zyrat dhe të shkonin të shikonin ku ndodhej inceneratori i Tiranës, i cili nuk ekziston. Por Qeveria shqiptare dhe Bashkia Tiranë, vazhdojnë e paguajnë para për incenerim. Ndërkohë që incenerator nuk ka.

Prandaj e gjithë skema ka qënë thjeshtë dhe vetëm një mashtrim për publikun. Ka qënë thjeshtë dhe vetëm një marrëveshje e Ramës dhe Bashës për të mbyllur një herë e mirë dosjen e inceneratorëve.

Ashtu siç CNA.al ka mbajtur qëndrim edhe më parë, gjithçka duan ta mbyllin me lekët që kanë gjetur në xhepat e Lefter Kokës.

Por, gjithçka nuk fillon dhe nuk mbaron tek Lefter Koka. Fillon dhe mbaron në godinën e Kryeministrisë, ku është zhytur edhe Lulzim Basha e të tijët, në këtë aferë, që e vërtetuan me shërbimin që i bënë së fundi, duke i mbyllur dosjen e aferës së shekullit.

Një dosje që siç e kemi deklaruar fillon me një kontratë 178 milionë euro, për tre koncesione, Elbasan, Fier dhe Tiranë, dhe përfundon me rreth 430 milionë euro. Ku mesa duket brenda në zullum tashmë qartazi është përfshirë dhe Lulzim Basha. Si asnjëherë më parë turpësisht, Opozita bëhet pjesë e një skenari të Qeverisë për të mbyllur një aferë korruptive./CNA.al

Inceneratorët, afera korruptive që do mbyllet me procedurë si krimet e Lulzim Bashës

Kush urdhëroi bankat të fshehin të dhënat e kompanive të inceneratorëve?

51 fakte dhe dokumente për aferën e inceneratorëve

Skandali-Nga pronarët e mediave tek kompanitë off shore/ Skema e plotë e koncesionit të inceneratorëve, emrat e përfshirë

Si nisi koncesioni i inceneratorëve, emrat e përfshirë dhe blerja e mediave/ Fundo zbërthen aferën korruptive