Vendimi drastik, klubet e Superligës bojkotojnë kampionatin e ardhshëm

5 Gusht 2020, 13:03, Sport CNA

Federata Shqiptare e Futbollit ditën e sotme ka organizuar një mbledhje me përfaqësuesit e lartë të dhjetë klubeve të Kategorisë Superiore. Në këtë mbledhje janë diskutuar disa çështje, por kryefjala ka qenë vijimi i futbollit në kushte të vështira financiare për shkak të pandemisë dhe ndryshimet ligjore për lehtësimin e klubeve në këtë aspekt.

Liga Profesioniste, e përfaqësuar nga 10 klubet e Superiores, e cila në parim funksionon si institucion i pavarur nga FSHF, por deri tani kjo pavarësi nuk është arritur të jetë e mirëfilltë ka lajmëruar bojkotimin e kampionatit. Para disa ditësh në parlament u bënë disa ndryshime ligjore lehtësuese për sportin në përgjithësi, por Liga Profesioniste e Futbollit nuk është aspak e kënaqur me këto vendime dhe kërkon edhe liri të tjera financiare.

Në mbyllje të mbledhjes është publikuar një vendim, që njofton bojkotin e kampionatit të ardhshëm futbollistik në rast se nuk zbatohet një listë me katër pika kryesore të hartuara nga Liga Profesioniste. Ky organ pretendon miratimin e ligjit të ri të sportit, të sugjeruar nga vetë ata dhe kërkon heqje totale të tatimit të pagave të futbollistëve për gjithë dekadën e ardhshme nga qeveria. Kërkohet gjithashtu edhe zerimi i borxheve fiskale dhe kamatë-vonesave të klubeve.

VENDIM

Liga Profesioniste te Futbollit, pasi u njoh me ndryshimet ligjore për sportin të realizuara deri më tani, konstaton me keqardhje se këto ndryshime nuk i japin zgjidhje kërkesave te klubeve te Kategorisë Superiore dhe nuk përmbushin premtimet e bëra nga Qeveria Shqiptare ne tryezën e 11 marsit 2019.

Në këto kushte, Liga Profesioniste e Futbollit kërkon nga Qeveria dhe Kuvendi i Shqipërisë:

Miratimin e një ligji të ri për sponsorizimet sipas formës së propozuar nga komuniteti i futbollit, pasi ndryshimet e propozuara nga qeveria nuk kanë asnjë efekt real mbi ekonominë e futbollit.
Përfshirjen e të gjitha aktiviteteve ekonomike të futbollit në TVSH-në e reduktuar në masën 6%, si bujqësia dhe turizmi dhe jo vetëm infrastrukturën sportive.
Zerimin e gjobave dhe kamatë-vonesave për detyrimet fiskale të prapambetura përtë shmangur kolapsin financiar të klubeve.
Zgjatjen e efekteve të përjashtimit nga tatimi mbi të ardhurat për sportistët nga 2 në 10 vite.
Për sa më sipër, LPF vendosi, të bojkotojë Kampionatin Kombëtar të Kategorisë Superiore nga data 12 shtator e në vijim, deri në plotësimin e kërkesave te mësipërme.

LIGA PROFESIONISTE E FUTBOLLIT