E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Nga Indrit Vokshi/ Pse duhet e djathta "radikale"?

24 Korrik 2018, 19:15, Aktualitet CNA

Duhet me i ra në kokë problemit, jo me i shku rrotull:

Jemi nisur në vitin 1990 për “votën e lirë” por kemi përfunduar pa parlamentarizëm dhe pa parlament. Me para droge në fushatë, me lista deputetësh të emëruar nga kryetarët e partive, pa asnjë kriter politik, veç në kritere paraje, servilizmi dhe rekomandimesh prej miqëve. S’kemi pra parlament, se në vend që të kemi përfaqësues të popullit në parlament, kemi ambasadorë të kryetarëve të partive në çdo qark, të cilët artistikisht i quajmë deputetë.

Jemi nisur në 1990 për ekonomi tregu, por kemi përfunduar me ekonomi klientele. Janë 10 persona, artistikisht edhe këta të quajtur biznesmenë, të cilët kanë kapur pushtetin e shtetit dhe e përdorin për t’i marrë ata; ndërtimin e rrugëve, tenderat, tokat publike në pronësi të shqiptarëve, shërbimet e ndryshme. E përdorin që t’i miratojnë ata ligjet siç i duan, prej tek kontrolli i karburanteve, heq akcizë e vë akcizë, vendosin ata edhe për tarifat doganore, siç iu vjen për mbarë. Nuk lejojnë asnjë konkurencë në asnjë lloj biznesi. Madje ka shkuar puna deri aty sa po përdorin shtetin për t’ua bërë të paleverdisshëm njerëzve edhe biznesin e vogël të marketeve, sepse këta duan ta orientojnë gjithë popullin nëpër conade e qendra tregtare, ngaqë i kanë vetë. Pra po e përdorin pushtetin e shtetit shqiptar, për biznes.

Jemi nisur për polici apartiake, por kemi përfunduar me polici ku gjysma e kupolës drejtuese dalin kushërinj dhe, po të zbresim pak më poshtë, më shumë se gjysma janë kushërinj.

Me polici të provuar kombëtarisht dhe ndërkombëtarisht si promovuese e trafikut të kokainës, si fshehëse e urdhërave të interpolit, si strehuese e atyre që ka për detyrë t’i arrestojë.

Jemi nisur dhe e bëmë legjendë gjyqësorin e pavarur por, kemi përfunduar duke e kapur gjyqësorin haptas, pa iu bërë përshtypje, pa pasur nevojë as të kamuflohen më, pasi i kemi përgatitur njerëzit psikologjikisht për ketë kapje; “kush të jetë në pushtet, ai do ta ketë gjyqësorin, s’ka asgjë anormale kjo”.

Politikanë miliarderë me paratë e shqiptarëve, marrin përsipër të gjykojnë gjyqtarët për korrupsion dhe, këtu thyhet besimi tek proçeset, sepse njerëzit e kuptojnë se kur politikani që nuk ka lënë qindarkë pa vjedhur, përdor ligjin për të gjykuar gjyqtarët, nuk ka qëllime drejtësie, ka vetëm qëllime të kapjes dhe nënshtrimit të gjykatave në emër të krimit që përfaqëson.

Prandaj, politikanët të cilët nuk munden të vendosin një sistemi të drejtë zgjedhor, një ekonomi me konkurim telentesh dhe kapacitetesh, një polici që ka detyrë sigurinë publike për shqiptarët dhe jo sigurinë e partisë në pushtet, një gjyqësor i cili iu jep shqiptarëve drejtësi duke i bërë që prej gëzimit të drejtësisë ta duan shtetin e tyre, duhen larguar përgjithmonë.

Shqiptarët duhet ta kuptojnë se këta politikanë nuk i kanë as vëllezër, as kushërinj, as të afërm, që hajt për hir të gjakut ua dashka t’ua fshehin dhe tolerojnë gabimet dhe fajet. Si ishin këta, si nuk ishin këta, secilin puna e vet do ta mbajë, siç ka ndodhur deri më sot. Kështu që edhe nëse i përzënë, asgjë nuk humbin, përkundrazi, ka mundësi të fitojnë shumë.