Pasuritë e dyshimta të gjyqtarëve dhe prokurorëve/ Gati dosjet për tre mijë persona

23 Qershor 2018, 10:46, Aktualitet CNA

Inspektorati i Lartë i Deklarimit dhe Kontrollit të Pasurive dhe Konfliktit të Interesave ka grumbulluar plot 1 milionë e 200 mijë faqe me informacione për pasuritë e gjyqtarëve dhe prokurorëve në Shqipëri.

Sipas asaj që thuhet në raport, Inspektorati i Lartë bën me dije se këto informacione kanë kaluar në filtra të rrepta kontrolli dhe janë përpunuar të dhënat në mënyrë të detajuar për çdo person të përfshirë.

?Kthimi i përgjigjeve të ardhura nga kjo korrespondencë, përfshirë dhe dokumentacionin e dorëzuar nga vetë subjektet e rivlerësimit, arrin në një volum të konsiderueshëm me rreth 1 milion e 200 mije faqe për t’u administruar, vlerësuar, përpunuar dhe pasqyruar nëpër aktet e kontrollit. Kompleksiteti i këtij procesi shtohet jo vetëm nga volumi i madh i informacionit të marrë dhe nevojës për vlerësim e përpunim nga ILDKPKI, por mbi të gjitha nga administrimi i tij në mënyrë tërësisht manuale nga të gjitha palët e përfshira në këtë proces?, thuhet në raport.

Gati dosjet për 3 mijë persona

Inspektorati i Lartë Kontrollit të Pasurive thotë në raport se janë gati dosjet e 3 mijë personave, të cilat do të bëhen publike.

Madje, ILDKP bën me dije se dosjet e këtyre 3 mijë personave, që përfshin gjyqtarët, prokurorët, familjarët dhe të afërmit e tyre, i janë vënë në dispozicion edhe Operacionit Ndërkombëtar të Monitorimit, si institucion kyç, i cili mbështet organet e vetingut gjatë procesit të rivlerësimit kalimtar për njerëzit e drejtësisë,s hkruan gazeta Sot.

Sipas raportit, çdo dosje ruhet në shumë versione, ndërsa një kopje origjinale është në dispozicion të ILDKP, ONM dhe KPK. ?Aktualisht, dosja e çdo subjekti rivlerësimi krahas formatit shkresor (dosja fizike), kopjohet ne format elektronik (skanim), duke u ruajtur në serverat e institucionit, përkundrejt dosjes origjinale dhe kopjes elektronike të saj që dërgohet pranë KPK dhe ONM.

Gjithashtu, Inspektorati i Lartë mbi kërkesën e paraqitur nga ONM vendosi në dispozicion të vëzhguesve ndërkombëtarë listën me të dhënat e detajuara (atësi, datëlindje, numër identifikues, status civil etj) të nxjerra dhe të përpunuara në mënyrë manuale nga deklarata e pasurisë së dorëzuar në kuadër të rivlerësimit, së bashku me deklaratat e dorëzuara nga subjektet ndër vite, për më shume se 3.000 persona (subjekte të rivlerësimit dhe persona të lidhur)?, thuhet në raport.