web counter
LEXO PA REKLAMA!

SHKARKO APP

App Store
Google Play

E fundit!

x

Si po e shpëton Rama korrupsionin rus të Lulzim Bashës

9 Mars 2018, 18:47, Aktualitet CNA

Rama me ndërhyrjet e tij dhe medieve të tij, po përpiqet të shpëtojë Lulzim Bashën nga një skandal dhe çështje korruptive financimi në “Offshore”, me pronarë rus. Duke nxjerrë në konferenca për shtyp persona të papeshë dhe duke hedhur e pritur nga njëri-tjetri, Edi Rama dhe Lulzim Basha po përpiqen që të gjithë skandalin e financimeve korruptive në “Offshore”, ta kthejnë në një retorikë të rëndomë politike.

Edi Rama po bën një sallatë Ruse të shoqëruar me tallava shqiptare, për të shpëtuar lëkurën e Lulzim Bashës, gjë që po tregon se marrëveshja e 18 Majit po vazhdon. Të lëvizësh me figura të papesha, pa aksion politik, duke tentuar të shpëtojë Lulzim Bashën nga korrupsioni, nuk tregon gjë tjetër veçse vijimësinë e marrëveshjes.

Në fakt nuk ka as sallatë ruse e as tallava shqiptare që i bën derman Lulzim Bashës. Çdo mbështetje që i bën Edi Rama tregon, se marrëveshja e 18 majit vazhdon.

Një skandal i përmasave ndërkombtare i financimeve elektorale po kthehet në një retorikë të pështirë politike. Dalin e flasin deputetë të pavlerë, u përgjigjen kolegët e tyre, dhe ky është rasti më i qartë në Shqipëri, që tregojnë se kur palët duhet të ndërhyjnë për të mbyllur një çështje bëjnë gërr-gërr dhe e kthejnë në heshtje, si në rastin e skandalit “Salianji-GD”, ku nuk foli askush as opozitë, e as maxhorancë.

Tani skandali me burime korruptive të padeklaruara në fushatë elektorale, që thuajse është i njëjtë me financimin e drogës në fushatë, pasi të dyja janë burime jozyrtare. Në vend që të kenë qëndrime serioze me fakte dhe argumente konkrete, një herë heshtin e një herë bëjnë “gërr-gërr”.

Skandalet në Shqipëri, qoftë nga opozita qoftë nga maxhoranca, po kalohen si të jenë “trahanaja e mëngjesit” rekomanduar nga “Lali Eri”.

Rama me të tijët thonë se është skandal financimi i Bashës nga Rusët. Në fakt skandali i vërtetë është burimi i financimit, janë ose jo rusët kjo nuk ka rëndësi për momentin. E rëndësishme është një fakt, Lulzim Basha është konfuz dhe ende nuk ka sqaruar burimin e financimit të mbi 500 mijë dollarëve të ardhura nga “Offshore” me apo pa rusët brenda, kjo shumë është po aq korruptive sa paratë e drogës që kanë blerë zgjedhjet dhe kanë ndryshuar vullnetin politik të shqiptarëve më 25 qershor, pretenduar nga Lulzim Basha.

Të dyja palët po përpiqen që të “gatuajnë një sallatë ruse” të shoqëruar në sfond me tallava shqiptare, por në fakt skandali është një çështje korruptive, me burime të dyshimta financimi, që siç deklaron “Zëri i Amerikës”, ka paqartësi në burimin e të ardhurave.

Sallata ruse mund të jetë thjeshtë “ushqimi i radhës” për shqiptarët servirur nga kasta politike, ku në sfond dëgjohet tallavaja.

Për këtë herë duket e vështirë dhe totalisht e pamundur që Lulzim Bashën ta shpëtojë sallata që gatoi vetë ku hedh vaj dhe konsum politik pazaresh, Edi Rama. /CNA.al





Lajmet e fundit nga