web counter
LEXO PA REKLAMA!

SHKARKO APP

App Store
Google Play

E fundit!

x

Përse aleatët nuk mund ta shantazhojnë Bashën, për LSI-në?

8 Janar 2018, 20:39, Aktualitet CNA

Nga Mero Baze

Përpjekjet e aleatëve të vegjël të Partisë Demokratike për të kushtëzuar PD-në në reformën zgjedhore, në raport me LSI-në, është një temë e bezdisshme, e cila mund të përfundojë me humbjen e tyre. Të pesë partitë e vogla aleate me Partinë Demokratike, nuk mund të kushtëzojnë aleancën PD -LSI nga pozita ideologjike, pasi interesi kryesor i PD-së është ardhja në pushtet, dhe jo formimi i ndonjë të djathte shembullore.

Ka disa arsye që Basha mund të mos i përfillë kërkesat e tyre.

E para dhe kryesorja, ato janë parti që i kanë vënë gjobë rregullisht PD-së vetëm për të qenë fasada e saj, dhe jo për të pasur vota. Simbol i kësaj historie është padyshim Fatmir Mediu, i cili nuk ka dalë asnjëherë si deputet i Partisë Republikane, kryetar i së cilës formalisht është, por si deputet i PD. Kështu dhe të tjerët, kush më shumë e kush më pak, përfshi dhe Dukën, që për herë të parë që u fut në siglën e një partie të madhe, humbi.

Së dyti, në zgjedhjet e fundit, këto parti luajtën një rol negativ në demokracinë e brendshme në PD, dhe shërbyen si zjarrfikës të krizës brenda PD-së. Ato shërbyen si fasadë për të mbuluar spastrimet e Bashës brenda PD-së dhe braktisjen nga PD, duke shitur aleancën me to, si vitalizim i PD. Ata qëndruan në çadër, jo si luftëtarë, apo si militantë që i jepnin tonin, por si mercenarë, që një herë në dy javë kërkonin çmimin e asaj që po bënin, derisa siguruan vendet në lista dhe duke injoruar krizën e brendshme në PD, për interes të tyre.

Në këtë aspekt, Basha i ka përdorur një herë për hallin e vet dhe i ka shpërblyer. Tani nuk është në hall me LSI-në, por në aleancë me të.

E treta, që është dhe me rëndësi, Basha ka interes jetik aleancën me LSI, pasi këto parti kanë provuar parimin, që ?shumë parti të vogla, bëjnë një parti të vogël? dhe nuk kanë ndonjë peshë elektorale, kurse LSI është një nga partitë më të strukturuara në vend, me parime të qarta elektorale, jo ideologjike. Kështu që, Partisë Demokratike i duhet LSI-ja, jo vetëm për mandate, por dhe energji elektorale dhe infrastrukturën e organizimit.

Ndaj dhe këto shantazhet e aleatëve të PD-së ndaj PD, lidhur me reformën zgjedhore, duhet të jenë të moderuara, brenda rolit dhe mundësive që ato kanë. Ato mund të kenë fuqi kushtëzuese, vetëm nëse dalin më vete dhe provojnë që së bashku arrijnë të bëhen faktor elektoral. Deri më sot, janë faktor teatral! /TemA





Lajmet e fundit nga