NJE KRYELAJM, NËNLAJMI dhe PJESHKA...

12 Tetor 2016, 16:43, Aktualitet CNA

Tre nga më të fuqishmit e më pak se 2 milionëve shqiptarë të Shqipnisë së poshtme përkatësisht Kryetari i Shtetit, kryetari i Ekzekutivit, dhe ai i Legjislativit, dje kishin dalë ndër miq. Mediat gjithashtu nuk bënë ndonjë sqarim lidhur me atë se ishin koordinuar publikisht, nëndheshëm, apo hiç e koordinuar kjo vizita e zotërve. Ajo që nuk u harrua të vendosej në krah të kryelajmit si “nënlajm…” ishte se te tre kishin marrë nga një “valixhe” me vete. Dhe për të vijuar më tej me “entertainment-in” dinak te mediave, mbas kryelajmit dhe nënlajmit, ishte vendosur një retiçencë grafike. Nëkuptimësia, shumëkuptimësia apo pakuptimësia, janë truke te konsumuara, po gjithmonë të suksesshme te lajmësve. Kureshtja shqiptare normal që kishte ngecur tek përmbajtja e valixheve. (E ku ka kurioz më të epërm sesa shqiptari…shqiptari vdes për enigmastikë)

Kryetari i shtetit në Itali, kur hapi valixhen tek homologu i tij 60 milionësh, nxori prej andej një maket të hartës së vockël të Shqipnisë krejt e gjelbëruar nga rilindja. Kryetari i Legjislativit para 9milion grekërve me interlokutorët u pa disi në vështirësi; ta hapte a të mos e hapte “valixhen”. Po ta hapte nuk do të pritej mirë, por dhe të mos e hapte, do linte pezull pritshmërinë e dy popujve “miq”. Po si një urtak i rafinuar “me qetësi e dashuri”, zgjodhi alternativen e tretë, e hapi vetëm paksa…dhe fap, e mbylli. Nga brendia e valixhes u duk diçka si Çamri, po askush nuk mund ta thoshte me siguri kete. “U hap, s’u hap. U pa s’u pa…”kaloi dhe kjo ashtu. Shefin tonë të Ekzekutivit në Gjermaninë 90 milionëshe e priti Kryetari i Komunës së një qyteti. (I kishin thënë Kancelares se do të vinte Rama i rilindjes, po ajo ishte çuditur me këtë emër. Askush nuk e besoi në këtë rast çudinë e Kancelares. Dhe ka informacione te sigurta, se ishte vetë Kancelarja që i’a ngarkoi Kryetarit të Komunës, detyrën e pritjes së vizitorit…) Edhe pritshmërisë së ankthshme të shqiptarve këtej, po i vinte fundi, sepse valixhja e shefit te Ekzekutivit po hapej nën veshtrimin kurioz të reflektorëve, kamerave, dhe këshilltarëve komunalë.

Duart e shkathëta të valixhembajtësit shkelën butonat, dhe kapaku kërceu përpjetë. Dhe…Pjeshka…ne fund të valixhes një kokërr pjeshkë… Buzëqeshja horizontale brenda qimeve të thinjura të mjekrës se valixhembajtësit, u duk në fillim si nënqeshje, pastaj u var mbi mjekër me nervozizëm ironik. Fokusoni Pjeshkën, ç’doni mjekrën! -u pa Kryeministri t’u kanosej ca dojç-reporterëve…, që s’po i’a ndanin vemendjen. -Kazane…dreqi…” Vizitat vazhduan suksesshëm gjithë diten e djeshme, pa incidente diplomatike. ZEF ZEFI