Nga Kastriot Myftaraj/Kolonja si test për PD-në dhe Bashën

27 Shtator 2016, 18:11, Aktualitet CNA

Zgjedhjet e parakohshme në Kolonjë përbëjnë një test interesant politik dhe zgjedhor, sepse kryetari i bashkisë së Kolonjës, i cili vdiq, i përkiste LSI-së dhe garoi me mbështetjen e koalicionit zgjedhor të partive qeverisëse, duke pasur mbështetjen e PS-së, LSI-së etj. Kolonja nuk ishte një nga rastet ku LSI pati ankesa të mëdha për mosfunksionim të koalicionit zgjedhor, për prapaskena, sepse kandidati i saj Arben Malo mori 4437 vota, ose 53. 45% të votave. Sigurisht që pati një bojkot të kandidatit të LSI nga PS, por jo të ndjeshëm.
Logjikisht edhe kandidatin e ri do ta propozojë përsëri LSI. Kështu që Kolonja do të shndërrohet në një përplasje PD-LSI. Pra, Kolonja do të bëhet një test për atë nëse PD dhe Basha kanë vullnet t? i rezistojnë gërryerjes së elektoratit të tyre që po u bën LSI që nga viti 2013 e këtej.
Në zgjedhjet e Kolonjës nuk vlejnë justifikimet me kartelin e drogës që ble vota. Sepse në këtë rast karteli do të jetë Meta dhe LSI, të cilin deri tani Basha e ka diferencuar nga karteli. Në Kolonjë karteli do të jetë neutral, madje do t? i pëlqente një humbje e LSI-së, ndonëse nuk do të investohej për të sepse kjo do të shkaktonte një konflikt të hapur të Metës me Ramën. Nëse PD humb në Kolonjë, kjo do të jetë humbje e PD-së përballë LSI-së.
Kandidati për kryetar bashkie në Kolonjë, në zgjedhjet e vitit 2015 i koalicionit të udhëhequr nga PD (Aleanca për Punë dhe Dinjitet), z. Viktor Duro mori vota më shumë se koalicioni që e mbështeste atë. Zoti Duro mori 3710 vota, ose 44. 69% të votave. APPD mori 2379 vota për Këshillin Bashkiak, ose 28. 86%. Brenda koalicionit, PD mori 1921 vota për këshillin bashkiak, ose 23. 31 % të votave. Kjo do të thotë se në zgjedhjet në Kolonjë vitin e kaluar, problemi nuk ishte te kandidati port e performanca e partive të koalicionit zgjedhor që e mbështeste atë, dhe së pari te partia kryesore e koalicionit, PD.
Në këto zgjedhje të parakohshme në Kolonjë duhet llogaritur edhe që brenda koalicionit të majtë do të ketë një rrjedhje votash nga ana e PS-së që nuk do t? i shkojnë PD-së, por thjesht do të jenë një lloj bojkoti ndaj kandidatit të LSI-së. Kjo gjë, e kombinuar me një rritje minimale të PD-së, do të sillte fitoren e kandidatit opozitar, meqënëse diferenca e tij në zgjedhjet e kaluara me kundërshtarin ishte vetëm 5-6%.
Që nga zgjedhjet e vitit të kaluar dhe deri më sot kanë ndodhur, ose nuk kanë ndodhur shumë gjëra, të cilat logjikisht duhet t? i shtonin votat e PD-së në këto zgjedhje të parakohshme. Qeveria ka prodhuar shumë skandale, dhe për premtimet që i janë bërë Kolonjës nuk ka nisur të bëhet asgjë konkrete, e prekshme, përveç ndonjë rregullim fasadash. Pra PD dhe koalicioni zgjedhor i kryesuar prej saj, duhet të kenë këtë herë më shumë vota se në 2015. Nëse llogarisim që votat e z. Duro, të cilin PD duhet ta paraqesë përsëri si kandidat, do të mbeten aq sa janë dhe nuk ka arsye përse të dyshohet për këtë gjë, atëherë nëse shtohen votat e PD-së dhe të koalicionit të drejtuar prej saj, me 2-3 %, duke llogaritur edhe një bojkot minimal të kandidatit të LSI-së nga elektorati i PS-së, atëherë z. Duro shpallet fitues në këto zgjedhje të parakoshme në Kolonjë.
Nëse PD nuk arrin as kaq, por justifikohet për mbetjen në kuotën ku ra në 2015, duke na treguar kushedi se ç? fabula, atëherë humbja e Kolonjës përballë LSI-së, vetëm sa do të konfiromojë zbritjen e PD-së në rangun e partisë së tretë në vend, pas PS-së dhe LSI-së. Zgjedhjet ne Kolonje kane rendesi para se gjithash se do te tregojne nese Lulzim Basha eshte vasal i Metes apo jo.SHKRUAR PËR CITYNEWS