Nga Spartak Ngjela/ Nulandi e dha dje shah-matin amerikan kundrejt Saliut

11 Korrik 2016, 19:30, Aktualitet CNA

Ashtu sikundër që ju paralajmërova, Viktoria Nulandi e dha dje shah- matin amerikan kundrejt Saliut. Janë kyçur injorantët e tij që menduan se do të mundnin Amerikën në demokraci dhe në procedurë. Ata nesër duhet të japin përgjigje vetëm me një po! ose me një jo! Ne fakt kështu duhej sjellë me neoosmanët shqiptarë të momentit, që po sillen me shqiptarët njëlloj si osmanët që digjnin me zjarr shkollat shqipe dhe mësuesit shqiptarë…
Gjithçka përfundoi në favor të antikorrupsionit. Vetingu është detyrë ekzekutive e Shteteve të Bashkuara dhe Bashkimit Europian.
Ç’është vetingu? më pyesin shumë miq. Këta birbore politikanë nuk e përkthejnë, se duan ta kenë abstraksion, që shqiptarët ta marrin si një gogol antikombëtar. Por termi “veting” vjen nga folja e gjuhes angleze “vet”, që do të thotë egzaminim i sëmundjeve te njerëzit dhe kafshët.
Madje, nga kjo fjalë vjen dhe termi “veteriner”. Domethënë, në rastin shoqëror e shtetëror, vetingu është kontrolli i imtësishëm i atij që do të merret me pune publike. Në rastin tonë, është kontrolli i pastërtisë së figurës të gjyqtarëve dhe prokurorëve.
Pikërisht, me formulen e re, kjo sërish u ka mbetur në dorë absolute amerikanëve dhe ekspertëve të Bashkimit Europian.
Këta pastaj do t’ia paraqesin për konfirmim një komisioni të posaçëm nga politika… Qe nuk mund të dalë jashtë të përzgjedhurve të vetingut ndërkombëtar.
Ky ishte mati…A do t’i thote Jo! Saliu? Pamundësi absolute, nëse do të ketë dhe pak mend për veten.
Korrupsioni shqiptar është në grahmat e fundit. Nuk ka më forcë. Amerikanët nuk ndahen nga vendosja e drejtësisë në Shqipëri. Kjo vepër e tyre në ndihmë të shqiptarëve është e barasvlershme me çlirimin që ata i bënë Kosovës.
Çdo thotë nesër Saliu?
Do llomotite nga shqetësimi…por kokëulur do shkojë të votojë vetingun amerikano-gjerman në datën 21 korrik.
Jemi në fund të poshtërimit tonë. Drejtësia shqiptare do të mbajë si histori vulën amerikane… ashtu sikundër çlirimi i Kosovës dhe shpëtimi i Shqipërisë nga copëtimi i sigurt i vitit 1919 – 1920.
Koha është e shqiptarëve dhe prandaj atdheu do të bëhet më në fund i tyre.
Bashkë me vendosjen e drejtësisë në Shqipëri, fillon dhe vlerësimi ala perëndimor i mendjes dhe intelektit shqiptar, që historikisht është i poshtëruar ligsht nga tiranitë që kanë kaluar, dhe nga korrupsioni, sidomos nga korrupsioni aktual.