Kosove/Opozita 'e përçarë' në qëndrime rreth Asociacionit

17 Gusht 2015, 16:40, Kosova & Bota CNA

Paralajmërimet e Qeverisë së Kosovës për mundësinë e arritjes së marrëveshjes me Qeverinë e Serbisë rreth krijimit të Asociacionit të Komunave me shumicë serbe, kanë nxitur reagime të hershme të opozitës.

Krijimi i këtij Asociacioni është paraparë me marrëveshjen për normalizimin e marrëdhënieve ndërmjet Kosovës dhe Serbisë të datës 19 Prill 2013.

Por, ajo nuk është konkretizuar ende, ngaqë këtij organizimi të ri nuk i janë përshkruar edhe kompetencat.

Megjithatë, opozita kësaj radhe nuk është unike në qëndrimet politike, siç ka ndodhur me disa procese tjera.

Përderisa Lëvizja Vetëvendosje kundërshton në çdo formë krijimin e Asociacionit të Komunave serbe, subjekti tjetër opozitar, Aleanca për Ardhmërinë e Kosovës do ta kundërshtonte këtë Asociacion, vetëm nëse në dialogun e Brukselit Qeveria do të pajtohej që t’i këtij trupi t’i visheshin edhe kompetenca ekzekutive.

Zëdhënësi i Aleancës për Ardhmërinë e Kosovës, Muharrem Nitaj, ka thënë për Radion Evropa e Lirë se AAK që moti e ka mbështetur krijimin e këtij Asociacioni, sipas Planit Gjithëpërfshirës për Statusin e Kosovës i njohur si Plani i Ahtisaarit.

Ndërkaq, çdo marrëveshje e re që do t’i parashihte edhe kompetencat ekzekutive për këtë Asociacion, sipas Nitajt, do të ishte e papranueshme.

“Ne nuk do të pranojmë asnjë formë organizimi që është në kundërshtim me kushtetutën dhe rregullimin shtetëror të Kosovës. Asociacioni i Komunave me shumicë serbe nuk mund të ketë kompetenca ekzekutive dhe ne shpresojmë që këtë nuk do ta pranojnë as ata që po negociojnë aktualisht në Bruksel edhe për këtë organizëm”, ka thënë Nitaj.

“Nëse ndodh ndryshe, pasojat për Kosovën do të jenë të pariparueshme. Qëndrimi ynë është – të gjitha të drejtat për komunitetet pakicë, në këtë kuadër edhe për komunitetin serb, mirëpo jo në dëm të shtetit të Kosovës”, ka deklaruar zëdhënësi i AAK-së.

Kryeministri i Kosovës, Isa Mustafa ka paralajmëruar se në takimin e radhës me homologun e tij nga Serbia, Aleksandar Vuçiq, që me gjasë do të mbahet më 25 gusht në Bruksel, ndër marrëveshjet tjera mund të jetë edhe ajo për Asociacionin e Komunave me shumicë serbe.

I menjëhershëm ka qenë reagimi i Lëvizjes Vetëvendosje e cila ka paralajmëruar ndërmarrjet e masave, siç i quan ajo, radikale, në kundërshtim të këtij Asociacioni.

Nënkryetari i Vetëvendosjes, Driton Çaushi, e ka cilësuar Asociacionin serb si momentin më të keq për Kosovën, që nga shpallja e pavarësisë. Andaj, ai ka thënë se do të ndërmerren një varg veprimesh për të kundërshtuar këtë marrëveshje eventuale dhe këtë Asociacion.

“Protesta do të jetë vetëm një nga format që ne do ta shfrytëzojmë. Kemi bërë me dije ditët e fundit që ne nuk do ta reduktojmë aktivizmin tonë dhe kundërshtimin tonë në vetëm një metodë. Do të jemi radikal në kundërshtimin e kësaj marrëveshje për Asociacionin e Komunave Serbe”, ka deklaruar Çaushi.

Me krijimin e Asociacionit të Komunave serbe, sipas zyrtarit të Vetëvendosjes, shteti i Kosovës do të hynte në një fazë të defunksionalizimit, çka sipas tij, do të duhej të ndalohej nga partitë politike dhe qytetarët.

“Pra, po shkojmë drejt defunksionalizimit të shtetit të Kosovës drejt shndërrimit në një shtet me ndarje etnike, jo funksional dhe pa perspektive. Prandaj, presim që edhe te qytetarët do të jetë mobilizimi i të njëjtit nivel që në çdo mënyrë ta kundërshtojmë një marrëveshje të tillë”, ka theksuar Çaushi.

Në anën tjetër, Aleanca për Ardhmërinë e Kosovës, sipas zëdhënësit Muharrem Nitaj, nuk e ka diskutuar ende çështjen hipotetike se si do të veprohej nëse Asociacionit të Komunave Serbe do t’i atribuoheshin edhe kompetenca ekzekutive.

“Nuk është diskutuar kjo në parti dhe ne shpresojmë që nuk do të ketë fare nevojë të diskutohet, sepse besojmë fuqishëm që Asociacioni i Komunave me Shumicë Serbe, realisht nuk do të ketë kompetenca ekzekutive”, ka thënë Nitaj.

Mospajtimet rreth kompetencave të Asociacionit të Komunave me Shumicë Serbe në negociatat që Prishtina dhe Beogradi po zhvillojnë në Bruksel, shihen si arsyet kryesore që kanë shtyrë deri më tani themelimin e këtij trupi.

Kryeministri Isa Mustafa ka thënë javën e kaluar se ky Asociacion nuk do të ketë kompetenca ekzekutive, pasi që Kosova nuk e njeh nivelin e tretë të pushtetit, që ka të bëj me autonominë e një rajonit apo territori të caktuar, siç është në këtë rast veriu i Kosovës.

Përderisa në Beograd në vazhdimësi është thënë se ky Asociacion do të ketë edhe kompetenca të veçanta.