E fundit!

14:03 Politikë

Kur do të votohen në PD Gaz Bardhi dhe Agron Gjekmarkaj?

Dje është zhvilluar mbledhja e e dytë e Këshillit Kombëtar...

Studiuesit: Poezia shqipe ndodhet në krizë

22 Mars 2015, 07:27, Aktualitet CNA

Dita Botërore e Poezisë, 21 marsi, riktheu vëmendjen tek kjo krijimtari letrare, problemet që po hasin autorët shqiptarë dhe mungesën e politikave që kërkon letërsia. Kritikë dhe autorë të ndryshëm pohojnë se përballë krijimtarisë me vlera ka dhe nga ato që lënë për të dëshiruar. Studiuesi dhe kritiku Behar Gjoka në kuadër të Ditës Botërore të Poezisë u shpreh se kur flitet për poezinë, në Shqipëri mungojnë politikat nga institucionet që duhet ti vijnë në ndihmë krijimtarisë dhe autorëve.

?Kur flasim për poezinë shqipe, gjendet sot më shumë në përpjekje individuale se sa në politikat kulturore të Ministrisë së Kulturës, se sa në politikën e botuesve dhe të shpërndarjes së librit. Me këto probleme, në këtë moment poezia shqipe është në krizë të pranisë së saj, se sa të mundësive për ta verifikuar atë. Në momentin kur organizohen konkurse ndërkombëtare, pse nuk mendohet të integrohet poezia shqipe kudo që shkruhet??, shprehet studiuesi dhe kritiku Behar Gjoka.

Në reagimin e tij, studiuesi Behar Gjoka për mungesën e shpërndarjes së librave me poezi shprehet se duhet të ketë vëmendje Ministria e Kulturës. ?Për shpërndarjen e librave të poezisë, Ministria e Kulturës duhet të detyrojë libraritë që të pranojnë librat poetikë, sepse nuk ka. Ndërkaq që ndërmjet institucioneve të politikbërjes dhe atyre shkencore e shkollore, duhet të organizohen herë pas here debate mbi gjendjen e poezisë, jo të mbetet tek situata që ka poezi gjeniale apo nuk ka poezi?, pohon studiuesi Gjoka.

Përballë këtyre problemeve, studiuesi Gjoka shton se kur flitet për prirjet e poezisë, ajo që mund të cilësohet krijimtari e mirë mungon për shkak të problemeve. ?Poezia sot ka më tepër prirje për t?u çliruar nga detyrimi i tematikave shoqërore dhe ideore. Është poezi erotike dhe herë-herë erotizëm i panevojshëm. Është më moderne, por realisht gjendet në një situatë që ka më shumë poetë se sa poezi. Kjo do të thotë që poezia e mirë mungon, për shkak të gjitha problemeve që folëm?, cilëson në fjalën e tij Behar Gjoka, studiues. Për mendime të tjera kritike, vitet e fundit poezia shqipe ka prurje të shumta, por cilësia vihet në diskutim edhe nga mungesa e kritikës letrare.

Me këtë mendim është dhe shkrimtari e kritiku Pandeli Koçi, i cili shprehet se mungesa e kritikës sjell çoroditje. ?Në poezinë shqipe vitet e fundit ka ardhje të shumta, por mungon kritika letrare për të vlerësuar dhe për të nxjerrë në dritë cilësinë dhe mediokritetin. Mungesa e kritikës sjell çoroditje në perceptimin e poezisë më të mirë dhe ka probleme në krijimtari. Megjithatë kemi pasur dhe krijime të mira poetike, madje dhe në nivelin më të mirë në gjithë Europën?, pohon kritiku letrar Koçi. Ndërsa në Ditën Botërore të Poezisë në shtete të tjera janë në vëmendje dhe aktivitete për këtë pasuri letrare, dje nga Ministria e Kulturës nuk u lajmëruan aktivitete, por kjo ditë kaloi vetëm me organizime veprimtarish private.