web counter
LEXO PA REKLAMA!

SHKARKO APP

App Store
Google Play

E fundit!

x

INSTAT: Indeksi i çmimeve të prodhimit ulet me 1.3%

7 Mars 2015, 12:36, Aktualitet CNA

Indeksi i çmimeve të prodhimit pësoi rënie në tremujorin e fundit të vitit 2014, duke theksuar akoma më shumë dobësimin e presioneve mbi çmimet.
Sipas të dhënave nga Instituti i Statistikave, çmimet e prodhimit në vend u ulën mesatarisht me 1.3% ndaj të njëjtës periudhë të vitit 2013. Rënia ka qënë e shpërndarë si në segmentin e industrisë nxjerrëse, me -5.6%, ashtu edhe në industrinë përpunuese, me -0.7%. Nëndega industriale me uljen më të fortë të çmimeve të prodhimit ka qënë ajo e nxjerrjes së naftës bruto dhe gazit natyror. Ulja drastike e çmimeve të naftës në tregjet ndërkombëtare ka bërë që indeksi i prodhimit të këtyre produkteve në Shqipëri të ulet me 7.9%.
Edhe në industrinë përpunuese një pjesë e mirë e nëndegëve kanë shënuar rënie. Për t?u përmendur ulja e indeksit të prodhimit në nëndegën e përpunimit të produkteve të lëkurës, pjesë e rëndësishme e industrisë fason, me -2.5. Ulja e çmimeve ka prekur kryesisht produktet e destinuara për tregun vendas, me -2.1%, ndërsa produktet për eksport regjistruan një rritje të lehtë të çmimeve me 0.3%. Indeksi i çmimeve të prodhimit mat çmimet me të cilin ato hidhen në treg nga prodhuesit.
Ecuria e tyre është një tregues i rëndësishëm i shëndetit të bizneseve. Në kushte normale, një ulje e çmimeve nënkupton ulje të stimujve për të rritur prodhimin, punësimin dhe pagat. Megjithatë, në situatën aktuale, vlerësohet se ulja është e përkohshme dhe i detyrohet kryesisht faktorëve të ofertës, si ulja e çmimeve të lëndëve të para. Çmimet e prodhimit kanë edhe një vlerë orientuese për prirjet e inflacionit në të ardhmen e afërt. Një rritje e ulët e çmimeve të prodhimit përcillet në rritje gjithashtu të ulët të çmimeve të konsumit.





Lajmet e fundit nga