Ndal dhuratave korruptive dhe hipokrite për mësuesit!

5 Mars 2015, 08:45, Opinione CNA

Nga Artan FUGA

Mësuesi ose mësuesja që pranon dhurata për festës e mësuesit është i (e) padenjë dhe meriton të përbuzet.

Unë shpresoj që ministria e arsimit do të rinxjerrë nesër një qarkore për këtë 7 mars, ta bëjë publike dhe jo ta mbajë në sirtare drejtorësh militantë, t’i drejtohet edhe nxënësve dhe familjeve të tyre, jo vetëm mësuesve, shoqëruar me kontrolle dhe masa disiplinore, e jo kot sa për të larë gojën e pirë lëngun, ku të urdhërojë mësueset sidomos që me rastin e festës të motrave Qiriazi të mos i grrijnë familjet e nxënësve nga lekët duke u marrë nxënësve dhurata gjoja të sinqerta e në shenjë respekti në formën e :

– varësve të floririt ose unazave të shtrenjta
– deodoranteve të shtrenjtë ndonëse fallco dhe buzëkuqeve të turpshëm
– veshjeve të jashtme dhe të brendshmeve si mbathje, sutjena, kanatjera, kravata, këpucë, kostume, etj.
– zarfeve me lekë ku prindërit lenë edhe njëmijëlekshin e fundit në vend ta blejnë karburant për veturën e vjetër gjysëm të vjedhur
– pagesave për bileta udhëtimi avionesh, dhoma hotelesh pushimi në Turqi ose Siri a ku e di unë ku tjetër.
– dhuratave për fëmijët ose familjarët e zyshave që nuk duan vetëm për 7 por edhe për 8 marsin nga një dopio dhuratë personale dhe kolektive nga të gjithë nxënësit.
– elektroshtëpiakeve, si televizora, ose edhe të INTC si telefona iphone 6, e të markave të tjera, orëve, tabletave, e gjithçkaje tjetër numerike.
– luleve të blera shtrenjtë, apo vazove që me naivitetin dhe thjeshtësinë e tyre kushtojnë me mijra lekë dhe fshihen nën slloganin e ndyrë : Lule për mësuesin!
– të gjitha dhuratave që jepen nëpër klasa dhe auditorë që janë forma të shëmtuara korrupsioni dhe ku ai që nuk ka respekt për ndonjë mësuese idiote ose mësuesi batakçi të detyrohet të bëjë hipokrizi duke ju bashkuar tufës së luleve duke u fshehur pas gjetheve ose kokrrave të verdha të mimozave që sjellin alergjira të ndryshme.
– punës të papaguar të prindërve, korveve mesjetare, në shtëpitë e mësuesve, si rregullim dritaresh, krevatesh, lyerje me bojë vaji, ose dhuratave të tilla si tablo piktorësh, medikamenteve të ndryshme që nga viagrat e deri të aspirinat kardiovaskulare, etj.
– vezëve, domateve, kastravecave, byreqeve, tortave dhe prodhimeve të tjera agro-ushqimore, si edhe ndalimin e vizitave muzeale nëpër shtëpi mësuesish.

Dhuratat e të gjitha formave nga nxënësit ose nxënëset, sidomos nga ata më të mirët dhe nga ata më të këqinjtë, janë forma korrupsioni dhe bakshishe të ndyra orientaliste, që duhen ndaluar me forcën e ligjit ose të urdhërit administrativ. Respekti për mësuesit që është një ndjenjë e brendshme dhe sa e natyrshme aq edhe sublime, kur mësuesi e meriton, nuk ka nevojë të shprehet së jashtmi me lloj lloj sjelljesh servile që mbulojnë hipokrizi dhe shoqërohen me detyrimin shtrëngues që të gjithë nxënësit të mësohen të bëjnë kulte, lavde të detyruara për autoritetet.

Dhuratë e sinqertë eshtë vetëm ajo e nxënësit që nuk të ka më mësues, por a kini vënë re sesa pak dhurata ju bëhen ish mësuesve? Sepse respekti i vërtetë tregohet pas marrëdhënies konkrete të vartësisë dhe nuk tregohet me dhurata.

Dhurata të tilla ose rite të tilla janë njësoj si synetllëqet e dhunshme, martesat qysh në djep, e tradita që nuk kanë vend në shoqërinë e emancipuar.

Familjet shqiptare kanë nisur të dridhen me afrimin e festës të mësuesit.

Mësues të padenjë po përgatiten t’i rrjepin nën presionin e respektit tradicional që është kthyer në një instrument e mekanizëm prodhimi paraje korruptive si indulgjencat që shkatërroi Luteri me lëvizjen reformatore.

Hiqeni këtë njollë të zezë dhe turpi shkollë s shqiptare që mjaft e ka të vuajë nga projektligjet arkaike që po përgatiten të çojnë në Kuvend ku arsimi sakralizohet në bnanalitetin dhe mediokritetin e vet të tanishëm.

Beter !

Nxënës dhe nxënësve përbuzni dhe tregojeni me gisht tallës gjithkënd që bën dhuratë për mësuesin ose pedagogun, mësueset, duke e detyruar të skuqet nga turpi për servilizmin e vet dhe nënshtrimin ndaj autoriteteve me forma blatimi dhuratash, si forma mesjetare dhe rurale marrje me të mirë të atyre që hiqen se kanë në dorë të vendosin për fatin tuaj.

Gëzuar festën e mësueseve dhe mësuesve !