Si keqtrajtohen gradat dhe titujt shkencorë nga drafti i projektligjit të arsimit të lartë!

24 Shkurt 2015, 21:57, Opinione CNA

Nga Artan FUGA

Duke lexuar ato nene që trajtojnë çështje të rolit dhe funksionit të profesoratit me tituj e grada, bën përshtypje se karakterizohen nga :
– një arkaizëm i thellë,
– dhe nga një qasje tejet burokratike,
– e vjetruar,
– që çon në stagnacion,
– si edhe nga një lloj esencializmi metodologjik e botkuptimor rrënqethës.
Duket sikur ndërtohet logjika e kastave hindu, të ndara e të prera prej njera tjetrës, të ngurtësuara e pa lëvizje,
duken gradat e titujt si spaleta që nuk shtyjnë për punë, por si klasifikime dhe hierarki simbolike kazermash.
Ja disa aspekte :
1. Profesori e merr titullin, dhe pastaj nuk ka asnjë motivim titullor për të ecur më tej.
Ja pse një pjesë e profesorëve e ul prodhimin shkencor pas marrjes të titullit. Natyrshëm, kanë cikur tavanin e karrierës. Atëhere kur duhet të prodhojnë më shumë, ligja u thërret : Ndal! Nuk shkoni dot më tej! Po përse nuk bëhet edhe titulli profesor me disa shkallë o të uruar? Që edhe profesori të jetë në kërkim e në lëvizje.
2. Profesori bëhet i tillë nga Universiteti ku jep mësim.
Titulli ka kuptim brenda universitetit dhe jo më tej. Por, çfarë kuptimi pastaj ka të kërkosh që një universitet të akreditohet kur ka një numur profesorësh? Kështu hyn në një tautologji logjike që vetëm përpiluesit e draftit ndofta nuk e kuptojnë. Dua të akreditohem? Bëj sa të duash profesorë. Vetë vendos, vetë vulos.

Por, kështu krijohen gardhe për mobilitetin e profesorëve nga një universitet te tjetri, kështu krijohen vetëvlerësime që janë forma monologimi skizofrenik.Profesori duhet të njihet nga instanca kombëtare. Ku e gjetët modelin e kundërt?

3. Profesori nuk gjykohet më nga të ngjashmit e fushës së vet, por nga një komision në senat.

Ku shkon kritika shkencore, oponenca shkencore nga profesorët e kombit në atë fushë? Kush ka frikë nga debati shkencor?

4. Profesori s’paska të drejtë të drejtojë më shumë se tre a katër doktorantë!!!

Por, a e dini or të uruar se pa një grup pune kërkimi shkencor, kërkimi shkencor nuk bëhet?

A keni bërë ndonjëherë kërkim shkencor apo jo? Keni monografi të botuara kërkimi shkencor apo jo? Po nuk patët është e kotë të shpjegohet.

Pse me tre a katër kokra krijohet grupi i kërkimit? Ja një profesor merr në drejtim 10 doktorantë që marrin tema nga një fushë dhe plotësojnë njera tjetrën, në këtë rast ka më logjikë që ai të drejtojë dhjetë sesa tre doktorantë, nëse këta të tre i merr nga fusha të ndryshme pa lidhje me njera tjetrën, ose me problematika pa lidhje koherente nga e njejta fushë.

Pse me shifra mekanike zgjidhen këto punë?

5. Pedagogu merret me kontratë të përkohshme dhe pastaj bëhet doktor nëse mbron një tezë.

Cfarë është kjo? Shpëtojeni profesoratin nga skizofrenia ku e kanë futur që kolegun me kontratë të plotë a të përkohshme ta ketë edhe koleg edhe “”nxënës”!

Nuk bëhet kjo punë sepse u bëmë qesharakë. Nuk ndodh kjo askund. Mos merrni më në punë pa qenë doktora më parë. Hapini rrugë meritave jo kushërinjve të hallës, tezes, xhajës, dajës !

6. Doktori bëhet doktor përjetë.

Jo, ore, jo, nuk ka grada për jetë, cdo katër vjet duhet të dalin përpara jurive me parametra për ta mbrojtur gradën a për tê marr titull. Se shkencëtar për jetë nuk ka. Duket doktori si ata deputetët që kanë nga 25 vjet deputet. I kanë hypur kalit dhe nuk zbresin.

7. Hoqën, mësimin teorik nga shkolla doktorale.

Nuk e dinë se ai mësim teorik krijon komunitetin e përbashkët teorik të kërkuesve shkencorë. Nuk e dinë se shkenca është fryt i një komuniteti, shkencëtari nuk është ushtar i vetmuar që rri në karakoll, është ekip, skuadër.

Ku bën dot doktoratë tezari i vetmuar? Keni bërë ndonjë anketë me doktorantë apo jo?
Si t’ua shpjegosh teoritë absolutisht tê pranuara të Tomas Kuhnit e të tjerëve? E pamundur. Duhet të flasësh me dokltora që t’u shpjegosh sesi bëhet një shkollë doktorale.

8. Hoqën këshillat e profesorëve, po kush do ta drejtojë kolektivisht aktivitetin shkencor të një fakulteti?

Kush? Askush. U kanë prerë kokat fakulteteve.

Cfarë të thuash më parë! Lëre mos e nga!