web counter
LEXO PA REKLAMA!

SHKARKO APP

App Store
Google Play

Zhgënjejnë ekipet e kryeqytetit, festë tek Elbasani dhe Egnatia

20 Shtator 2025, 21:01, Sport CNA

Zhgënjejnë ekipet e kryeqytetit, festë tek Elbasani dhe Egnatia

Java e katërt në Superiore, ka nisur me dy supersfida, të cilat prodhuan gola, por edhe kartonë të kuq.

Egnatia regjistroi fitoren e dytë radhazi në kampionat, pasi mposhti Tiranën me rezultatin 2-0 në një ndeshje të dominuar totalisht.

Ndeshja nisi spektakolare dhe me raste nga të dyja krahët, megjithatë pa rrezik konkret. Pas 15 minutave të para, Egnatia mori kontrollin e lojës dhe iu afrua golit në dy raste me Buriç, i cili nuk kishte shënjestrën e duhur.

Në minutën e 28-të, Vogli shpërdoroi një rast të shkëlqyer për Tiranën dhe në kundërsulm, Egnatia gjeti avantazhin, me Buriç që këtë herë nuk gaboi.

Dy minuta më vonë, Ruçi ishte i pafat, kur pa gjuajtjen e tij të ndalej nga shtylla. Mesfushori gjeti golin në fund të pjesës së parë, por festa u prish nga VAR-i që e anuloi, për pozicion jashtë loje.

Pjesa e dytë nisi sërish me Egnatian në sulm, me Albanesen që dyfishoi shifrat me një supergol nga distanca.

Në minutat e mbetura, Tirana ishte e pafuqishme për të reaguar, ndërsa e mbylli ndeshjen me 10 lojtarë, pasi Marku u ndëshkua me të kuq në fund.

Në duelin tjetër, Elbasani triumfoi minimalisht ndaj Partizanit në kryeqytet. Verdheblutë konfirmuan momentin e mirë në këtë fillim sezoni dhe vazhdojnë në krye.

Në stadiumin “Arena e Demave”, Partizani e nisi më kërkues me dy raste të mirë për shënim, me Hjumen dhe Bintsuka.

Elbasani reagoi dhe gjeti avantazhin me Bunjakun në minutën e 36-të. Sulmuesi përfitoi nga një top i Qoses dhe e ndali atë në fundin e rrjetës.

Ky gol vendosi pjesën e parë, ndërsa nuk kishte ndryshime as në pjesën e dytë.

Për “demat” u bë gjithçka më e vështirë në minutën e 59-të, kur Bytyçi u ndëshkua me karton të kuq, duke lënë vendasit me 10 lojtarë.

Në superioritet numerik, miqtë e kishin më të lehtë për të menaxhuar avantazhin dhe ia dolën të marrin 3 pikë të arta, të cilat i mbajnë në krye të renditjes.





Lajmet e fundit nga