Teuta-Vllaznia për fitore, Dobi: Sulmi shkodran? Jemi shumë mirë në mbrojtje

20 Shtator 2025, 16:57, Sport CNA

Teuta-Vllaznia për fitore, Dobi: Sulmi shkodran? Jemi shumë mirë

Teuta-Vllaznia është padyshim supersfida e javës së katërt në Superiore. Ky ekipet vijnë në formë të shkëlqyer dhe do të kërkojnë me çdo kusht triumfin.

Teuta mori suksesin e parë ndaj Dinamos, por sipas trajnerit Enkeleid Dobi, ende nuk ka qetësi, pasi duhet vazhdimësi dhe stabilitet.

"Shumë kohë nuk kemi pasur që të jemi shumë të qetë, është intensive kjo javë. Qetësia ndoshta pas ndeshjes me Vllazninë. Gjithmonë kur fiton duhet të jemi të kënaqur, por duhet të kemi vazhdimësi dhe stabilitet. Kjo jo vetëm në futboll, por edhe në jetën e përditshme është shumë e rëndësishme."

I pyetur për formën e mirë të sulmit të Vllaznisë dhe neutralizimin e tyre, Dobi theksoi se ekipi durrsak do të minimizojë pikat e forta të kundërshtarit, duke thënë se ekipi i tij ka treguar paraqitje të mira në prapavijë.

"Ndonjëherë gjërat nuk shkojnë si i duan të gjithë. Jemi në proces, duhet të jemi pak të tolerueshëm që të gjithë gjërat të funksionojnë si duhet. Vllaznia pa i marrë meritat, ka sulm të rrezikshëm, ka formuar ekip solid, kompakt. Si e them gjithmonë, ne përshtatemi me kundërshtarin. Do mundohemi t’i minimizojmë këto gjëra. Ne kemi marrë në 3 ndeshje vetëm 1 gol. Edhe mbrojtja jonë është në nivelin e duhur. Do mundohemi ta mbajmë këtë nivel, organizim loje sepse janë shumë të rëndësishme për ne. Të minizojmë forcat dhe anët pozitive apo të rëndësishme që ka Vllaznia."

Në krahun tjetër, te Vllaznia për mediat foli sulmuesi i afruar në verë, Çarls Bismark. Ganezi u shpreh i lumtur për këtë aventurë të re në Shkodër, ndërsa shtoi se pret fitore ndaj Teutës.

“Jemi përgatitur mirë. Besoj tek ekipi. Edhe besojmë që nesër jemi për fitore. E dimë që është ndeshje shumë e rëndësishme edhe jemi për fitore, shpresojmë të fitojmë”, u shpreh Bismark fillimisht duke komentuar ndeshjen me Teutën.

Mikpritja? Jam mjaft i lumtur, janë njerëz mjaft të mirë. Edhe kur jam në qytet, çdokush më mirëpret mjaft mirë. Kjo më jep motivim për në lojë, edhe kur jam në fushë mundohem të jap më të mirën."

Ndeshja Teuta-Vllaznia do të luhet pasditen e kësaj të diele në Durrës, duke nisur nga 19:00.