E fundit!

14:36 Politikë

Votimi i marrëveshjes 302 milionë dollarëshe/ PD bojkoton seancën

PD ka vendosur të mos jetë pjesë e seancës që pritet të mb...

Ukraina surprizon me stadiumin, zbulohet ku do të luhen ndeshjet e “play off”

11 Dhjetor 2025, 17:30, Sport CNA

Ukraina surprizon me stadiumin, zbulohet ku do të luhen ndeshjet e

Federata e Futbollit të Ukrainës ka marrë një vendim që ka surprizuar të gjithë. Për fazën “play off” të kualifikimeve të Kupës së Botës 2026, ukrainasit kanë zgjedhur që ndeshjet e tyre të zhvillohen në Spanjë, konkretisht në Valencia, impianti ku ekipi i Levantes luan ndeshjet e kampionatit.

Ky ndryshim është i pazakontë, pasi prej fillimit të konfliktit me Rusinë, Ukraina ka zhvilluar shumicën e ndeshjeve të saj në Poloni, e cila ka qenë baza kryesore pritëse e kombëtares.

Vendimi është marrë nga Komiteti Ekzekutiv i Federatës Ukrainasë, i cili ka miratuar zyrtarisht stadiumin spanjoll si impiantin kryesor për dy ndeshjet potenciale të fazës “play off”.

Kapaciteti prej 26 mijë e 354 vendesh, kushtet infrastrukturore dhe disponueshmëria e stadiumit janë cilësuar si elementet që e kanë bërë atë zgjidhjen më të përshtatshme. Administrata e Federatës është ngarkuar tashmë të përfundojë marrëveshjen me klubin dhe të informojë UEFA-n për vendimin e marrë.

Sipas kalendarit të përcaktuar nga UEFA, Ukraina do të luajë më 26 mars ndeshjen gjysmëfinale të “play off”-it kundër Suedisë.

Nëse arrin të kalojë këtë raund, ekipi i drejtuar nga Rebrov do të luajë finalen më 31 mars, sërish në të njëjtin stadium në Valencia. Në atë sfidë, Ukrainës do t’i duhet të përballet me fituesin e çiftit Poloni–Shqipëri, një takim që për kombëtaren shqiptare do të ishte historik nëse arrin të kualifikohet.

Federata ka parashikuar që edhe në rast të humbjes së njërës prej skuadrave në ndeshjet e para, takimi i dytë do të zhvillohet po në Valencia si një miqësore e detyrueshme, në përputhje me formatin e ri të vendosur nga UEFA për këtë fazë të kompeticionit.

Ky vendim i Ukrainës lidhet drejtpërdrejt me pamundësinë për të luajtur ndeshje zyrtare në territorin e saj për shkak të sulmeve ruse dhe situatës së pafavorshme të sigurisë.

Në këtë kuadër, zhvendosja në Spanjë konsiderohet si një zgjidhje e qëndrueshme dhe e garantuar për organizimin e ndeshjeve me rëndësi të lartë. Për Shqipërinë, nëse arrin të përfshihet në finalen e 31 marsit, Valencia mund të jetë vendi ku luhet një nga sfidat më të rëndësishme në historinë e kombëtares.