web counter
LEXO PA REKLAMA!

SHKARKO APP

App Store
Google Play

Skënderbeu zhgënjen, në Korçë feston Teuta

11 Shtator 2024, 21:07, Sport CNA

Skënderbeu zhgënjen, në Korçë feston Teuta

Skënderbeu u mposht në shtëpi nga Teuta, me rezultatin 3-2, në ndeshjen e vlefshme për javën e katërt në Superligë.

Paraqitje zhgënjyese e korçarëve, përpara publikut të tyre, duke u rikthyer te humbja, pas fitores me Vllazninë në ndeshjen e javës së tretë.

Sfida nisi me Skënderbeun më kërkues, me vendasit që gjetën golin e avantazhit në minutën e 8-të. Nikaj shfrytëzoi në maksimum një krosim të marrë nga Rashica dhe me kokë e ndali topin në fundin e rrjetës, duke mposhtur portierin Tafas.

3 minuta me vonë, skuadra e Gvozdenovic ishte me fat, pasi gjuajtja me kokë nga Peposhi, u ndal në tranversë dhe më pas në vijën fatale.

Vendimtar Tafas në minutën e 21-të, kur me një pritje spektakolare, i mohoi supergolin Gërxhos. Në minutën e 37-të, në stadiumin e Skënderbeut pllakosi heshtja.

Beqja vendosi baraspeshën, duke shënuar me kokë, pas një krosimi në zonë. Në fundin e pjesës së parë, Nikaj provoi të rikthente Skënderbeun në avantazh, por Tafas ndali tentativën.

Fraksioni i dytë i lojës, nisi sërish me korçarët në sulm dhe në minutën e 50-të, Rashica pa portierin kundërshtar t’i mohojë sërish golin.

Kur pritej avantazhi i vendasve, rrugën e rrjetës e gjetën miqtë. Në minutën e 66-të, Preknicaj, pas një sulmi të shpejtë, ia doli të shënojë golin e përmbysjes dhe të avantazhit për Teutën.

Për t’i dhënë goditjen përfundimtar korçarëve, mendoi Arsid Kruja, i cili realizoi golin e tretë për miqtë në minutën e 73-të.

Për pjesën e mbetur të ndeshjes, Skënderbeu tentoi të reagojë, por e kishte të vështirë për të shënuar dhe golin e gjetën vetëm në fund me Rashicën, por kishte vetëm vlerë statistikore.

Me këtë fitore, Teuta ngjitet në vendin e katërt me 6 pikë, ndërsa Skënderbeu zbret i shtati me 4 pikë të grumbulluara.





Lajmet e fundit nga