E fundit!

10:10 Aktualitet

Tensione jashtë Kuvendit/ Policia nis shoqërimet

Policia ka nisur shoqërimet e para të protestuesve që tent...

Grushte dhe tifozët në fushë, çfarë ndodhi në Vlorë

20 Dhjetor 2025, 14:45, Sport CNA

Grushte dhe tifozët në fushë, çfarë ndodhi në

Flamurtari dhe Teuta kanë barazuar 2-2 në stadiumin e Vlorës, në ndeshjen e javës së 17-të, e cila u shënua jo vetëm nga katër gola, por edhe nga një incident i rëndë dhune që çoi në ndërprerjen e saj për disa minuta.

Takimi nisi me shumë duele në mesfushë dhe pak hapësira për lojë të hapur. Teuta u shfaq më e organizuar në pjesën e parë, duke kontrolluar ritmin dhe duke kufizuar iniciativën e Flamurtarit. Pas disa rasteve sporadike në të dyja portat, durrsakët gjetën avantazhin në minutën e 21-të. Boçi përfitoi nga një top i gjatë në qendër, tentoi një parabël mbi portierin Aleksovski dhe realizoi golin e epërsisë për Teutën.

Pas golit, Flamurtari u përpoq të reagojë me goditje standarde dhe tentativa nga krahu, por pa arritur të mposhtë portierin Selmani. Pjesa e parë u mbyll me avantazhin 1-0 të Teutës, e cila u tregua më konkrete në finalizim.

Në pjesën e dytë, loja u shoqërua me më shumë tension. Në minutën e 69-të, pas një zënke mes lojtarëve në fushë, situata agravoi, pasi nga tribuna ballore hynë edhe tifozë vendas, të cilët u përfshinë në përplasje me lojtarët e Teutës. Gjyqtari ndërpreu menjëherë ndeshjen, ndërsa forcat e policisë ndërhynë për të vendosur rendin. Takimi u pezullua për disa minuta dhe rifilloi vetëm pasi u boshatis tribuna ballore dhe u garantua siguria.

Pas rifillimit, Flamurtari rriti presionin dhe gjeti golin e barazimit në minutën e 78-të. Pas një goditjeje dënimi të harkuar në zonë, Çantakias u shkëput mirë dhe me kokë dërgoi topin në rrjetë. Vlonjatët vijuan të kërkojnë golin e avantazhit dhe ia dolën në minutën e 90-të, kur pas një aksioni nga e majta, Maksuti asistoi për Oshafin, i cili realizoi përmbysjen në 2-1.

Në minutat shtesë, Teuta nuk u dorëzua dhe kërkoi me insistim barazimin. Në minutën e 97-të, pas një goditjeje dënimi, topi përfundoi në shtyllën e dytë te Jazxhi, i cili e shtyu sferën në portë, duke vulosur rezultatin përfundimtar 2-2. Pas këtij goli, ndeshja u mbyll pa ngjarje të tjera.

Me këtë barazim, Teuta mban vendin e pestë në renditje me 25 pikë, ndërsa Flamurtari vazhdon të mbetet në zonën e poshtme të tabelës, duke u renditur i parafundit me 14 pikë.