web counter
LEXO PA REKLAMA!

SHKARKO APP

App Store
Google Play

Formula 1/ Dominim i McLaren, Norris i lë pas të gjithë

29 Qershor 2025, 18:13, Sport CNA

Formula 1/ Dominim i McLaren, Norris i lë pas të gjithë

Çmimi i Madh i Austrisë, zhvilluar në pistën e Spielberg, ka sjellë një tjetër triumf për Lando Norris, i cili siguroi fitoren e tretë për këtë sezon dhe të shtatën në karrierë. 

Oscar Piastri, shoku i skuadrës së Norris, tentoi të rrezikonte në fazën fillestare të garës, duke provuar disa herë të përmbysë pozitat në krye. Megjithatë, me kalimin e xhirove, ai u detyrua të pranojë epërsinë e britanikut dhe u rendit në vendin e dytë.

Podiumi u plotësua nga Charles Leclerc i Ferrarit. Francezi arriti të ruajë pozicionin e tretë, duke sjellë pikë të vlefshme për skuderinë, që pas këtij rezultati rikthehet në vendin e dytë në renditjen e përgjithshme për konstruktorët.

Piloti tjetër i Ferrarit, Lewis Hamilton përfundoi garën në vendin e katërt, duke zhvilluar një performancë të mirë, për të rikthyer entuziazmin te tifozët britanikë në prag të Çmimit të Madh të Britanisë në Silverstone. Pas tij, në vendin e pestë u rendit George Rusell, që këtë herë nuk arriti të përsërisë suksesin e një viti më parë në të njëjtën pistë. Mercedes, gjithsesi, mbeti me vetëm një makinë në fund, pasi Antonelli u përjashtua në xhiron e parë, pas një incidenti në kthesën e tretë.

Antonelli, në përpjekje për të kaluar Lauson dhe Bortoleto, gaboi në frenim dhe përplasi Verstappen. Përplasja shkaktoi një ndërprerje të shkurtër të garës me hyrjen e makinës së sigurisë në pistë. Të dy pilotët, Verstappen dhe Antonelli, u detyruan të tërhiqen menjëherë nga gara.

Në kahun tjetër, një ditë për t’u harruar për Uilliams. Albon u tërhoq pas vetëm 17 xhirove për arsye teknike, ndërsa Sainz nuk arriti të marrë pjesë fare në garë.





Lajmet e fundit nga