E fundit!

10:30 Kronika

Qarkullonte i armatosur/ 31-vjeçari arrestohet në rrethrrotullimin e Rinasit

Një 31-vjeçar është arrestuar në rrethrrotullimin e Rinasi...

Dita e ndeshjes/ Shqipëria synon triumfin ndaj Gjeorgjisë

10 Shtator 2024, 10:36, Sport CNA

Kombëtarja shqiptare do të përballet mbrëmjen e kësaj të marte me Gjeorgjinë, në sfidën e vlefshme për Grupin B1, në Ligën e Kombeve.

Kuqezinjtë e kanë të qartë, se kundërshtari përballë është shumë i vështirë, por synohet triumfi.

Shqipëria vjen pas një momenti shumë të mirë dhe me moralin e lartë. Triumfi ndaj Ukrainës, që ishte i pari në histori, ka krijuar një atmosferë pozitive dhe të shkëlqyer te kuqezinjtë.

Trajneri Silvinjo ishte i qartë në konferencën për shtyp, ku kërkoi kujdes nga ekipi i tij, duke vlerësuar maksimalisht kundërshtarin.

Gjeorgjia po kalon një periudhë të artë, ndoshta më të mirën në historinë e tyre. Pas shkëlqimit në Europian, aty ku fituan simpatinë e të gjithëve, për lojën e treguar, të besuarit e Sanjol, vazhduan ecurinë e mirë edhe në Ligën e Kombeve.

Në ndeshjen e parë, gjeorgjianët shkatërruan Çekinë, me rezultatin e thellë 4-1. Shqipëria duhet të ketë kujdes kundërsulmet, pasi Gjeorgjia njihet si një ekip që luan në mbrojtje, por rinisjet i ka shumë të shpejta.

Shqipëria gjithashtu është në moment të shkëlqyer, ndërsa për fatin e mirë, nuk ka dëmtime dhe të gjithë lojtarët e grumbulluar janë të gatshëm.

Kuqezinjtë duan të konfirmojnë se fitorja me Ukrainën nuk ishte e rastësishme dhe për këtë arsye nga fillimi, do të luajnë me një objektiv të qartë në mendje, të marrin 3 pikët.

Në të kaluarën, dy kombëtaren janë përballur 13 herë mes tyre, ku Gjeorgjia ka regjistruar 7 fitore, kundrejt 3 fitoreve të Shqipërisë dhe tri ndeshje janë mbyllur në barazim.

Fitorja e fundit e Kombëtares sonë është në vitin 2005 në “Qemal Stafa”, e vlefshme për kualifikueset e Botërorit “Gjermani 2006”, e cila u mbyll me rezultatin 3-2.

Megjithatë, Kombëtarja shqiptare ka një favor të madh në këtë takim, siç janë tifozët, me një “Air Albania” të mbushur në kapacitet të plotë dhe që pritet të jetë si një vullkan.

Një statistikë e veçantë jep shpresë për rezultat pozitiv në këtë takim. Trajneri Silvinjo nuk njeh asnjë humbje në stadiumin “Air Albania” dhe synon që rekordin ta zgjasë edhe pas Gjeorgjisë.

Disfata e fundit e Shqipërisë në këtë stadium daton më 16 nëntor 2022, 1-3 përballë Italisë në miqësore. Pas kësaj erdhi fitorja me Armeninë 2-0, e cila ishte dhe e fundit për Edi Rejën në stolin kuqezi.

Më pas në krye erdhi Silvinjo, i cili në 5 ndeshjet e zhvilluara brenda, numëron 4 fitore dhe një barazim. Tekniku brazilian kërkon të ruajë këtë vazhdimësi, ndërsa një fitore e radhës do ta linte Shqipërinë të vetme në krye të Grupit B1, e cila do të thoshte një hap i vogël drejt ëndrrës për ta parë Kombëtaren tonë në një Kampionat Botëror.

Ndeshja mes Shqipërisë dhe Gjeorgjisë do të luhet mbrëmjen e kësaj të marte, duke nisur nga ora 20:45.