web counter
LEXO PA REKLAMA!

SHKARKO APP

App Store
Google Play

E fundit!

x

Përurohet gjimnazi “Partizani”/ Veliaj: Një nga shkollat më të bukura që kemi ndërtuar

9 Tetor 2023, 12:17, Politikë CNA
Përurohet gjimnazi “Partizani”/ Veliaj: Një nga shkollat
Kryetari i Bashkisë së Tiranës, Erion Veliaj

Kryetari i Bashkisë së Tiranës, Erion Veliaj, përuroi gjimnazin “Partizani” në kryeqytet, i cili hapi dyert për nxënësit pas rindërtimit.

Veliaj tha se në gjimnazin “Partizani” është punuar me të njëjtën cilësi, si për çdo shkollë tjetër të ndërtuar në kryeqytet.

“Për ata që kanë qenë të shqetësuar pas tërmetit, të gjitha kolonat e shkollës janë përforcuar me çelik dhe beton. Prandaj dua të falënderoj inxhinierët, të cilët kanë punuar në një hapësirë relativisht të vogël, për t’u siguruar që edhe shkalla e emergjencave, që zakonisht vjen si shtojcë e ndërtesës, të jetë një pjesë kyçe edhe për estetikën e fasadës, duke ikur nga ato fasadat e vjetra si kuti shkrepëseje”, tha ai.

Kryebashkiaku shtoi se koha kur privati ndërtonte me cilësi më të lartë dhe ndërtesa më të bukura se godinat publike, mund të quhet e perënduar.

“Kur e nisëm këtë punë, ishim mësuar se çdo gjë e shtetit ishte më e shëmtuar, më e pistë dhe më e rrënuar, se ajo e privatit. Kur shikon sot shkollat “Servete Maçi”, “Sami Frashëri”, apo “Partizani”, gjërat e privatit duken më të vjetra, më të lëna pas dore dhe më të rrënuara. Më në fund, ia mbërritëm kohës kur dritën e syrit, që janë fëmijët tanë, e çojmë në shkollat me infrastrukturën më të mirë e më të bukur në vend. Fëmijët vërtet mund të jenë 25% e popullsisë, por janë 100% e së ardhmes sonë. Për çdo cenim që i bëhet një shkolle, një kopshti, një çerdheje, nuk ia keni bërë 25% të popullsisë, por 100% të së ardhmes sonë. Për sa kohë që çunat dhe gocat janë 100% e së ardhmes, duhet të jenë 100% në fokusin tonë, të energjisë sonë dhe të punës sonë”, deklaroi Veliaj.

Kryebashkiaku ftoi nxënësit të maksimizojnë kohën e shfrytëzimit të kësaj shkolle dhe mjediseve të saj, duke veçuar bibliotekën, ku mund të organizohen aktivitete kulturore, si dhe terrenet sportive, që mund të shfrytëzohen edhe pas orarit mësimor.

“Tani që kemi një ndërtesë fantastike si kjo, le ta mbushim me jetë. Kemi një bibliotekë që mund të hapet edhe për komunitetin. Kemi mundësi për të bërë aktivitete pafund, për t’iu bashkuar rrjetit të shkollave sportive, kampionateve, shkollave komunitare. Duhet të gumëzhijë edhe kjo palestër. Territori, në Tiranë, është bërë shumë i shtrenjtë. Nuk e kemi luksin të vëmë drynin në orën 14:00. Jam i bindur se tani që u bë shkolla, e gjithë lagjja do reflektojë bukurinë që ka shkolla, për të mos rënë në sy që është lënë pas dore dhe për të mbajtur hapin e saj, me pastërtinë që reflekton ky projekt i jashtëzakonshëm. Mund të them që është padyshim një nga shkollat më të bukura në Tiranë”, theksoi ai./ CNA





Lajmet e fundit nga