Debati për investimet e huaja/ Rama: Ftesë për vetëprapakthim kolektiv, Shqipëria s'ka për ta pranuar

10 Qershor 2026, 16:33, Politikë CNA

Debati për investimet e huaja/ Rama: Ftesë për

Kryeministri Edi Rama ka bërë një tjetër reagim në lidhje me investimet në turizëm. Me anë të një postimi në rrjetet sociale ku ka postuar një artikull që flet për investimet në Mykonos, Rama shkruan se teksa Greqia vijon me këto projekte, shqiptarët zihen me njëri-tjetrin dhe për gjëra që janë të sigurta.

Kryeministri shprehet se e gjithë bota e zhvillon turizmin dhe ekonominë duke matur sa investime të huaja tërheq, ndërsa ne duam të matemi se sa mund të rezistojmë.

Më tej, në reagimin e tij, Rama mohimin ndaj investimeve të huaja e cilëson si një ftesë për regres kolektiv, gjë që Shqipëria s’ka për ta pranuar.

Reagimi i Ramës

Greqia vazhdon “të shitet tek të huajt” me sukses, kurse ne na i kanë futur xixat nga të katër anët, që të zihemi mes veti edhe për 1+1 që bëjnë 2, e të vijmë vërdallë në udhëkryq, kur konkurrenca vazhdon vrapin për më shumë investime të huaja…

Po si mund t’i mbyllim ne rrugët për kapitalet e mëdha, tani që ato po nisin të vijnë në Shqipëri, pas tërë mundit të madh që kemi bërë për të ardhur në këtë pikë?!

Po tërë bota e zhvillon turizmin dhe ekonominë duke u matur me sa investime të huaja tërheq, ndërsa ne do të matemi me sa rezistojmë kundër tyre?!

Kjo është një ftesë për vetëprapakthim kolektiv, që Shqipëria nuk mund, nuk duhet dhe nuk ka për ta pranuar.

Ja përmbajtja e artikullit:

Marka të mëdha ndërkombëtare të hotelerisë po investojnë në Mykonos, ku hotele të reja me pesë yje nga Four Seasons, Fouquet’s dhe MGallery janë planifikuar të hapen së shpejti.

Pavarësisht tensioneve gjeopolitike dhe një sezoni sfidues për turizmin, Mykonos vazhdon të mbetet një nga destinacionet premium më të rëndësishme në Mesdhe.

Kompanitë ajrore po rrisin numrin e vendeve të disponueshme në fluturimet ndërkombëtare për sezonin 2026, me një rritje prej 7.1% të kapacitetit hyrës.

Po shtohen gjithashtu linja të reja ajrore nga Roma, Londra, Abu Dhabi dhe Dubai, duke forcuar më tej lidhjet ndërkombëtare të Mykonosit.

Një resort i ri me pesë yje, me vlerë mbi 100 milionë euro dhe i lidhur me investitorin egjiptian Naguib Saëiris, pritet të hapë dyert në maj të vitit 2027