web counter
LEXO PA REKLAMA!

SHKARKO APP

App Store
Google Play

E fundit!

x

Ekspozitë ndërkombëtare në Korçë/ Vezët e Pashkës kthehen në vepra arti

5 Prill 2026, 10:21, Kulturë CNA

Në Korçë është çelur për herë të parë ekspozita ndërkombëtare e dekorimit të vezëve të Pashkës, një aktivitet që sjell në vëmendje simbolikën e jetës, besimit dhe kulturës.

Ekspozitë ndërkombëtare në Korçë/ Vezët e

Ekspozita mbledh punime artizanale nga vende të ndryshme të Ballkanit dhe më gjerë, ku çdo vezë është e realizuar me dorë, duke përdorur teknika tradicionale me dyll dhe bojëra organike.

Ekspozitë ndërkombëtare në Korçë/ Vezët e

Përmes motiveve të pasura dhe simboleve të veçanta, këto vepra artistike përcjellin mesazhe të thella për rilindjen dhe shpresën.

Ekspozitë ndërkombëtare në Korçë/ Vezët e

Ideatorja dhe kuratorja e ekspozitës, Maria Shukulli, tregon se gjithçka nisi si një frymëzim familjar, pas një vizite në një muze të vezëve të Pashkës në Rumani. Nga një ide e thjeshtë, projekti u shndërrua në një ekspozitë të plotë artistike, ku çdo detaj mbart një kuptim të veçantë.

"Ideja kryesisht ka lindur nga im atë, pasi gjithmonë ka pasur shpirtin e udhëtarit dhe në Rumani është ndeshur me muzeun e parë të vezës së Pashkës. Nga atje mori një vezë për ta parë e për ta vlerësuar. Duke qenë se jemi familje artistësh, na lindi ideja për ta kthyer në diçka më shumë. E veçanta e ekspozitës është që përmban vezë të dekoruara Pashke, por me simbole, jo thjesht dekorime që mund të shihen në pamje të parë. Veza e Pashkës ka simbolin e një fillimi të ri, të jetës, ringjalljes, shpresës dhe, nëpërmjet shumë motiveve të bukura dhe mënyrave të jashtëzakonshme të dekorimit të vezëve, ajo arrin të shprehë këtë simbol. Të gjitha vezët janë bërë me dorë nga artizanë të ndryshëm, me dyll dhe bojë organike të krijuar nga bimët. Një vezë e vogël mund të dojë pak orë për t’u punuar, ndërsa vezët e strucit që kemi në koleksion mund të duan një deri në dy javë",-tha Shukulli.

Kjo ekspozitë hapet në prag të Javës së Madhe, duke sjellë jo vetëm art, por edhe reflektim shpirtëror për qytetarët. Për besimtarët ortodoksë, veza e Pashkës mbetet një simbol i fuqishëm i jetës së re.

Ekspozitë ndërkombëtare në Korçë/ Vezët e

Mitropoliti i Korçës, Imzot Anastasi, thekson se ashtu si zogu që çan vezën për të nisur jetën, edhe ringjallja e Krishtit përfaqëson fillimin e një jete të re për njerëzimin.

"Gëzim i veçantë që jemi sot në këtë ekspozitë që ka në qendër të saj vezën, sepse veza është simboli i jetës për ne të krishterët ortodoksë. Ashtu siç zogu e çan vezën nga brenda dhe fillon një jetë e re, ashtu edhe Krishti, duke dalë nga brenda varrit, na solli një jetë të re, të gëzueshme; prandaj i bëjmë vezët e kuqe. Është emocionuese që kjo ekspozitë hapet në vigjilje të Javës së Madhe dhe të shenjtë të Pashkës. Më jepet rasti i parë që t’u uroj të gjithë bashkëqytetarëve tanë një Javë të Madhe të bekuar, të mbarë dhe Pashka të na gjejë të gëzuar",-u shpreh  Imzot Anastasi.

Ndërkohë, sipas organizatorëve, aktiviteti nuk do të ndalet në Korçë. Ai pritet të udhëtojë edhe në qytete të tjera si Tirana, Berati, Fieri dhe Gjirokastra, për të përcjellë më tej këtë mesazh simbolik.

Ekspozitë ndërkombëtare në Korçë/ Vezët e

Regjisori Julian Napoloni e cilëson këtë ekspozitë si një thirrje për të vlerësuar jetën dhe për të reflektuar në një kohë kur bota përballet me sfida dhe shkatërrime. Përmes artit, kjo iniciativë synon të rikujtojë rëndësinë e ruajtjes së vlerave dhe besimit.

"Është një ekspozitë unike, e cila ndodh për herë të parë. Zgjodhëm Korçën sepse unë kam bindjen se Pashkët nuk festohen më bukur se këtu. Pas Korçës kemi zgjedhur Tiranën, Beratin, Fierin dhe Gjirokastrën. Sjellim një element të vogël si veza, por me shumë kuptim që lidhet me rilindjen, ringjalljen. Pavarësisht se flasim për Pashkën dhe vezën, fatkeqësisht sot në botë shkatërrohen kisha, rrënohen jetë. Le të jetë kjo ekspozitë një mesazh për të menduar më thellë, për t’i mbrojtur këto simbole dhe të mendojmë më shumë për ringjalljen dhe rilindjen e jo shkatërrimin. Këta autorë janë vajza kryesisht dhe vijnë nga vende si Ukraina, Rumania dhe Bullgaria, nga vende që aktualisht, me këtë shkatërrim që ndodh, sjellin këtë gjë të bukur",-tregon regjisori.

Kjo ekspozitë e veçantë ka bërë së bashku artin, traditën dhe besimin, duke rikujtuar përmes një simboli të thjeshtë si veza mesazhe të forta për jetën, ringjalljen dhe shpresën. Në prag të festës së Pashkës Ortodokse, kjo nismë vjen si një ftesë për reflektim dhe për të ruajtur vlerat që na bashkojnë, duke e kthyer artin në një urë komunikimi mes kulturave dhe brezave./CNA

 





09:19 Kulturë Agim Xhafka

ËMBËLSIRA MBI DOLLAP

Nuk di se ç’ëmbëlsirë shërbehet për drekën e Bajramit, por...

Lajmet e fundit nga