E fundit!

21:41 Politikë

“Shënim për ata që kujtojnë se ka mbetur ambientalizëm në protestë”/ Rama i përgjigjet komentuesve

Kryeministri Edi Rama i është përgjigjur komentuesve përme...

Shoqëria civile i kërkon Osmanit t’i bashkojë partitë për të miratuar buxhetin e Kosovës

28 Tetor 2025, 15:53, Kosova & Bota CNA

Shoqëria civile i kërkon Osmanit t’i bashkojë partitë

Një numër organizatash të shoqërisë civile në Kosovë i kanë kërkuar presidentes Vjosa Osmani ta ndërmjetësojë një marrëveshje ndërmjet partive parlamentare për miratimin e buxhetit të ri të vendit dhe të disa marrëveshjeve të rëndësishme financiare.

Kosova e bëri Kuvendin e ri muaj më parë, por javën e kaluar dështoi në formimin e një qeverie të re, gjë që ka rritur rrezikun që vendi të hyjë në vitin 2026 pa buxhet.

Në një letër drejtuar Osmanit, 21 organizata nënshkruese thanë se mungesa e buxhetit të ri do të paralizonte pagesat për pagat e mësimdhënësve, mjekëve, administratës publike, për transferet sociale të qindra mijëra qytetarëve të Kosovës, realizimin e punëve publike, dhe më shumë.

“E ardhmja financiare e vendit dhe mirëqenia e qytetarëve nuk duhet të bëhen peng i bllokadave politike. Ne besojmë se përvoja, autoriteti dhe roli juaj unifikues si presidente mund të jenë përcaktues për të shmangur një krizë që do të prekte shumë familje në Kosovë”, thuhet në letër.

Këto organizata i propozuan presidentes, siç thanë, disa rrugë të mundshme ligjore dhe të zbatueshme.

Ato kërkojnë që qeveria në detyrë ta dorëzojë në Kuvend projektligjin e buxhetit për vitin 2026, apo Kuvendi i tanishëm të paktën ta votojë një zgjatje të buxhetit të tanishëm deri në fund të muajit mars 2026.

Ato gjithashtu kërkojnë ratifikimin e Marrëveshjes me Bashkimin Europian për Planin e Rritjes, Marrëveshjes së Facilitetit, dhe Marrëveshjes së Huas.

Plani i Rritjes përmban një paketë prej 6 miliardë eurosh për të përkrahur përafrimin e ekonomive të gjashtë vendeve të Ballkanit Perëndimor me standardet europiane.

Nga kjo paketë, Kosova mund të përfitojë mbi 880 milionë euro, por mosratifikimi i marrëveshjes me bllokun ka bërë që ajo të mos jetë në gjendje ta marrë asnjë qindarkë ende nga kjo shumë.

Por, a mund një qeveri në detyrë të bëjë buxhet të ri?

Shumë ekspertë ligjorë vlerësojnë se qeveria në detyrë nuk mund dhe nuk ka kompetenca për të propozuar buxhet për miratim në Kuvendin e ri të vendit.

Në një intervistë për Radion Evropa e Lirë të hënën, eksperti i financave, Haki Shatri, tha se vetëm një qeveri me kompetenca të plota mund të ndërmarrë nisma për ndryshimin e ligjit për buxhetin, apo për vazhdimin e ndarjeve buxhetore edhe për muajt e parë të 2026-tës.

“Nëse nuk gjendet ndonjë zgjidhje që të funksionalizohet një e dymbëdhjeta e buxhetit në janar, edhe tërmet të ketë, nuk guxon askush të ndërmarrë asgjë”, tha ai.

Ish-ministri i Ekonomisë dhe Financave shtoi se pa një qeveri të re, në janar s’do të ketë para as për ushtrinë e Policinë.

Albert Krasniqi nga organizata Demokraci Plus shkroi të martën në "Facebook" se qeveria në detyrë - e zgjedhur nga legjislatura paraprake - nuk mund të propozojë projektligjin për buxhetin vjetor për legjislaturën e re.

“Kuvendi, që ende nuk ka zgjedhur qeverinë e re, nuk mund të miratojë ligje pa pasur qeverinë e vet që t’i zbatojë. Rregullorja e Kuvendit parashikon që projektbuxheti të shqyrtohet nëpër komisione parlamentare - komisione që ende nuk janë themeluar”, shkroi ai.

Ai tha se duhet të bëhet i qartë dallimi mes qeverisë në dorëheqje dhe qeverisë në detyrë, duke shpjeguar se qeveria në dorëheqje është ajo që gjatë mandatit të saj, pas dorëheqjes apo shkarkimit të kryeministrit, vazhdon të ushtrojë funksionet deri në formimin e qeverisë së re, duke pasur ende Kuvend funksional, komisione të themeluara dhe kanale komunikimi qeveri–Kuvend.

Gëzim Shala nga Instituti i Kosovës për Drejtësi shkroi në "Facebook" të hënën se qeveria në detyrë nuk ka të drejtë të propozojë buxhetin, e as Kuvendi nuk ka të drejtë ta votojë propozimin e buxhetit të kësaj qeverie në detyrë.

“Qeveria në dorëheqje i referohet një qeverie që është zgjedhur nga një legjislaturë e caktuar, e që vazhdon punën deri në momentin e zgjedhjes së qeverisë së re, dhe jo në rastet kur qeverisë i ka përfunduar mandati. Në rastin konkret, qeveria në detyrë nuk është zgjedhur nga kjo legjislaturë dhe nuk i takon asaj”, shkroi ai.