E fundit!

21:56 Aktualitet

Përfundojnë fjalimet/ Protestuesit nisin marshimin

Protestuesit për rreth dy orë kanë mbajtur fjalimet e tyre...

Punonjësi i vë flakën depos së mallrave/ Zjarr masiv në Kaliforni

9 Prill 2026, 13:26, Kosova & Bota CNA

Punonjësi i vë flakën depos së mallrave/ Zjarr masiv në

Një zjarr i fuqishëm që shpërtheu në një depo të madhe në Ontario është cilësuar si zjarrvënie e qëllimshme, ndërsa autoritetet kanë arrestuar një të dyshuar në lidhje me ngjarjen.

Flakët nisën rreth orës 00:30 të mëngjesit të së martës pranë rrugëve Hellman dhe Merrill, duke përfshirë Qendrën e Shpërndarjes së Kimberly-Clark, një objekt gjigant me sipërfaqe rreth 1.2 milionë metra katrorë. Në vendngjarje ndërhynë 175 zjarrfikës dhe 20 mjete zjarrfikëse, të cilët luftuan për orë të tëra për të vënë nën kontroll zjarrin.

Depoja, e mbushur me produkte letre si Kleenex dhe pelenat Huggies, u përfshi shpejt nga flakët, ndërsa sistemi i shuarjes së zjarrit u dëmtua pas shembjes së një pjese të çatisë. Zjarri u klasifikua me gjashtë alarme për shkak të përmasave dhe intensitetit të tij.

Rreth 20 punonjës ndodheshin në ndërtesë në momentin e shpërthimit të zjarrit, por fatmirësisht nuk u raportuan të lënduar. Një person që fillimisht u konsiderua i zhdukur rezultoi më vonë të ishte i dyshuari për zjarrvënie.

Policia identifikoi të arrestuarin si 29-vjeçarin Chamel Abdulkarim nga Highland, i cili punonte për kompaninë NFI Industries, një shpërndarës i palës së tretë për Kimberly-Clark. Ai përballet me disa akuza penale dhe mbahet në paraburgim pa mundësi lirimi me kusht.

Autoritetet deklaruan se zjarri u konsiderua i dyshimtë që në fazat e para, për shkak të përhapjes së shpejtë dhe pranisë së disa pikave të mundshme të origjinës. Motivi i ngjarjes mbetet ende i paqartë, ndërsa hetimet vijojnë.

Përveç dëmeve të mëdha materiale, zjarri ka lënë pa punë dhjetëra punonjës të magazinës. Ndërkohë, tymi i dendur që mbuloi zonën detyroi autoritetet të këshillojnë banorët, veçanërisht grupet e ndjeshme, të qëndrojnë brenda.

Deri në pasditen e së martës, zjarri ishte vënë nën kontroll dhe ekipet po vijonin me fazën e shuarjes përfundimtare./ CNA