Nga shkalla e dëmeve te kohëzgjatja e sulmeve/ Trump jep përditësime mbi fushatën ushtarake në Iran

1 Mars 2026, 22:49, Kosova & Bota CNA

Nga shkalla e dëmeve te kohëzgjatja e sulmeve/ Trump jep

Presidenti i SHBA-së, Donald Trump ka dhënë një përditësim mbi fushatën ushtarake në rritje në Lindjen e Mesme, përmes një video të postuar në platformën e tij “Truth Social”. Presidenti foli për shkallën e sulmeve, duke përshkruar një seri gjithëpërfshirëse sulmesh në të gjithë Iranin.

“Në 46 orët e fundit, Shtetet e Bashkuara dhe partnerët e tyre kanë nisur Operacionin Epic Fury, një nga ofensivat ushtarake më të mëdha, më komplekse dhe më dërrmuese që bota ka parë ndonjëherë”, tha Trump në fjalimin gjashtëminutësh.

Ai tha se sulmi kishte goditur qindra objektiva dhe kishte shkatërruar një pjesë të konsiderueshme të marinës së vendit. Trump tha se breshëria shkatërroi edhe objektet e Gardës Revolucionare dhe sistemet e mbrojtjes ajrore, përveç vrasjes së Udhëheqësit Suprem të Iranit, Ali Khamenei, dhe zyrtarëve të tjerë të lartë.

“E gjithë komanda ushtarake është zhdukur gjithashtu”, tha ai, duke shtuar se shumë në ushtrinë e Iranit tani po kërkojnë të dorëzohen.

Presidenti i cilësoi sulmet e fundjavës si fillimin e një sulmi më të zgjatur, duke thënë të dielën se operacionet luftarake vazhdojnë me forcë të plotë në ndjekje të objektivave të administratës. Ai nuk ofroi detaje të rëndësishme mbi asnjë nga këto objektiva specifike. Trump u shpreh se populli iranian e kishte mirëpritur sulmin dhe vdekjen e Khameneit.

“Në të gjithë Iranin, zërat e popullit iranian mund të dëgjoheshin duke brohoritur dhe festuar në rrugë kur u njoftua vdekja e tij”, tha Trump.

Presidenti Donald Trump tha se ka të ngjarë të ketë vdekje të tjera amerikane gjatë misionit luftarak në Iran, i cili sipas tij do të vazhdojë derisa SHBA-të të arrijnë objektivat e tyre.

“Operacionet luftarake vazhdojnë në këtë kohë, me forcë të plotë, dhe do të vazhdojnë derisa të arrihen të gjitha objektivat tona. Ne kemi objektiva shumë të forta”, tha ai pa specifikuar në detaje se cilat ishin ato.

Duke vënë në dukje vdekjet e tre ushtarakëve amerikanë të njoftuara më parë nga Komanda Qendrore e SHBA-së, presidenti tha se kombi po vajton humbjen e tyre. Ndër të tjera ai tha sot se anëtarët e Gardës Revolucionare Iraniane që do të dorëzojnë armët do të kenë imunitet të plotë dhe ata që refuzojnë do të përballen me vdekje të sigurt.

“I bëj thirrje edhe një herë Gardës Revolucionare, policisë ushtarake iraniane, të dorëzojnë armët dhe të marrin imunitet të plotë ose të përballen me vdekje të sigurt. Do të jetë vdekje e sigurt. Nuk do të jetë e bukur”, u shpreh Trump.

Duke iu drejtuar popullit iranian, Trump i bëri përsëri thirrje atyre që ta shfrytëzojnë këtë moment, duke shtuar se ai përmbushi një premtim ndaj tyre për të ndihmuar.

“Jini të guximshëm, të guximshëm, heroikë dhe rimerrni vendin tuaj. Amerika është me ju. Unë ju bëra një premtim dhe e mbajta atë premtim. Pjesa tjetër do të varet nga ju, por ne do të jemi aty për t'ju ndihmuar”, tha Trump.

Më herët gjatë ditës presidenti Trump dha një kohor të mundshëm për konfliktin e SHBA-së me Iranin, duke u shprehur se ai mund të zgjatet për disa javë.

“Gjithmonë ka qenë një proces katër-javor. Sado i fortë që është, është një vend i madh, do të duhen katër javë - ose më pak”, i tha Trump Daily Mail në një telefonatë të shkurtër. /CNA