web counter
LEXO PA REKLAMA!

SHKARKO APP

App Store
Google Play

Mbështetës i kauzave të shqiptarëve/ Ndahet nga jeta kongresmeni amerikan, Eliot Engel

10 Prill 2026, 21:53, Kosova & Bota CNA

Mbështetës i kauzave të shqiptarëve/ Ndahet nga jeta

Kongresmeni amerikan Eliot Engel, është ndarë nga jeta në moshën 79-vjeçare.

Engel, i cili ka përfaqësuar New York-un në Dhomën e Përfaqësuesve nga viti 1989 e deri më 2021, ka qenë zë i fuqishëm në SHBA për kauzën e shqiptarëve dhe mbështetës i pavarësisë së Kosovës.

Gjatë jetës së tij politike, Eliot Engel u bë i njohur për angazhimin e tij në politikën e jashtme amerikane. Ndërkohë ende nuk dihen arsyet për ndarjen e tij nga jeta.

Kosova ka emëruar një rrugë dhe një autostradë për nder të Engelit dhe ka lëshuar një pullë postare me fotografinë e tij. Më 8 dhjetor 2020, në një seancë dëgjimore në Dhomën e Përfaqësuesve, Engel kishte folur për Ballkanin Perëndimor, dhe veçmas për Kosovën.

“Nuk e dija pasionin që do të zhvilloja për një cep të vogël të Evropës, të quajtur Ballkan. Kam udhëtuar në çdo vend të Ballkanit Perëndimor disa herë, jam takuar me aq shumë udhëheqës nga aq shumë parti dhe kam dashuruar larminë e pasur të kulturave, etnive dhe feve. Por, asnjë vend nuk më ka prekur zemrën më shumë se Kosova”, kishte thënë ai asokohe, sipas REL. 

Për ndarjen e tij nga jeta ka reaguar edhe politika në Kosovë. Kryetarja e Kuvendit, Albulena Haxhiu tha se vendi humbi një mik të dëshmuar dhe përkrahës të palëkundur të lirisë dhe shtetësisë së Kosovës.

Kreu i PDK-së, Bedri Hamza u shpreh se Engel ishte zëri i drejtësisë për Kosovën në Shtetet e Bashkuara të Amerikës.

Kryetari i AAK-së, Ramush Haradinaj në reagimin e tij u shpreh se “shqiptarët do të jenë gjithmonë mirënjohës për kontributin e tij historik dhe të pazëvendësueshëm për lirinë dhe pavarësinë e Kosovës”.

Kryetari i komunës së Prishtinës, Përparim Rama shkruan në një postim në rrjetet sociale se Kosova do ta kujtojë gjithmonë miqësinë dhe përkushtimin e tij. /CNA





Lajmet e fundit nga