web counter
LEXO PA REKLAMA!

SHKARKO APP

App Store
Google Play

E fundit!

x

Fitorja e Meksikës ndaj Ekuadorit/ Festimet kthehen në tragjedi, 3 tifozë humbin jetën

1 Korrik 2026, 16:13, Kosova & Bota CNA

Fitorja e Meksikës ndaj Ekuadorit/ Festimet kthehen në tragjedi, 3

Tre persona kanë humbur jetën nga asfiksia, ndërsa mijëra tifozë u mblodhën në rrugët e Mexico City për të festuar fitoren e kombëtares së Meksikës në Kupën e Botës.

Sipas autoriteteve shëndetësore të kryeqytetit meksikan, ngjarja ndodhi pranë monumentit të njohur "Ëngjëlli i Pavarësisë", ku mijëra tifozë festuan suksesin 2-0 të Meksikës ndaj Ekuadorit, fitore që i siguroi skuadrës kualifikimin në fazën e 16 më të mirëve.

Ekipet e emergjencës ndërhynë në disa pika përgjatë bulevardit Paseo de la Reforma, ku gjetën tre persona pa ndjenja. Fillimisht u konfirmua vdekja e një burri 44-vjeçar dhe një gruaje 19-vjeçare si pasojë e asfiksisë. Më vonë, autoritetet njoftuan edhe vdekjen e një gruaje 48-vjeçare, e cila u transportua në spital pasi kishte pësuar asfiksi, por nuk arriti të mbijetonte.

Kryetarja e Bashkisë së Mexico City, Clara Brugada, shprehu ngushëllimet për familjet e viktimave përmes një postimi në platformën "X", duke u bërë thirrje qytetarëve që festimet të zhvillohen gjithmonë me përgjegjësi, kujdes dhe respekt për të tjerët.

Mijëra meksikanë dolën në rrugë për të festuar fitoren historike të kombëtares, e cila i dha fund një pritjeje 40-vjeçare për një sukses në fazën me eliminim direkt të Kupës së Botës.  Megjithatë, atmosfera festive u errësua nga tragjedia, ndërsa në rrjetet sociale u publikuan pamje të ekipeve të shpëtimit që u jepnin ndihmë personave të rrëzuar në rrugët pranë zonës së festimeve.

Mexico City, një nga zonat metropolitane më të populluara në botë me mbi 20 milionë banorë, është mësuar me grumbullime masive, por kjo ngjarje tragjike ka ngritur shqetësime për sigurinë gjatë festimeve të mëdha publike. /CNA





Lajmet e fundit nga