Dhurata e pazakontë e Erdogan për liderët e NATO-s

9 Korrik 2026, 17:13, Kosova & Bota CNA

Pas përfundimit të samitit të NATO, presidenti i Turqisë Rexhep Tajip Erdogan u dhuroi të gjithë krerëve të shteteve dhe qeverive një armë zjarri, revolver "Gumusay.357 Magnum', i prodhuar në Turqi në vitet 1990 nga kompania shtetërore MKE.

Arma ishte vendosur në një kuti druri me flamurin e Turqisë dhe logon e NATO-s, si edhe me një pllakë ku shkruhej se ishte “revolveri i parë i prodhuar në Turqi”.

Sipas zyrës së kryeministrit spanjoll Pedro Sanchez, të gjithë liderët morën të njëjtin model, të gdhendur me emrin e secilit.

Kryeministri belg, Bart De Wever ia dorëzoi menjëherë revolverin policisë së aeroportit në Bruksel për ta ruajtur në një kasafortë.

Ndërkohë, presidenti i Polonisë, Karol Nawrocki, e ka lënë armën në pritje të procedurave doganore në aeroportin e Varshavës, ndërsa një këshilltar i tij theksoi se ajo do të ruhet në mënyrë të sigurt dhe se “askush nuk do të qëllojë me të”.

Zyrat e kryeministrave të Holandës dhe Suedisë njoftuan se revolverët janë dërguar në ambasadat e vendeve të tyre në Ankara. Holanda planifikon ta çaktivizojë armën, ndërsa Suedia po pret përfundimin e dokumentacionit të importit.

Sipas një burimi nga Downing Street, revolveri i dhuruar kryeministrit britanik Keir Starmer ishte i pajisur edhe me një komplet pastrimi dhe 500 fishekë.

Nga ana tjetër, kryeministrja italiane, Giorgia Meloni e ka depozituar armën në Palazzo Chigi, bashkë me dhuratat e tjera shtetërore.

Presidentja e Komisionit Evropian, Ursula von der Leyen, synon ta dhurojë revolverin në një muze ushtarak, ndërsa kryeministri i Greqisë planifikon ta dorëzojë në Muzeun e Luftës në Athinë.

Dhurata e pazakontë synonte të promovonte industrinë turke të mbrojtjes, e cila është kthyer në një nga sektorët më të rëndësishëm të eksporteve dhe diplomacisë së Turqisë.

Sipas organizatës Small Arms Survey me seli në Gjenevë, Turqia ishte eksportuesi i tretë më i madh në botë i armëve të vogla gjatë periudhës 2019–2024, me eksporte me vlerë rreth 3 miliardë dollarë, pas Shteteve të Bashkuara dhe Italisë. /CNA