E fundit!

14:27 Politikë

Në kuadër të marrëdhënieve dypalëshe/ Rama zhvillon takim me presidentin Erdogan

Pas samitit të NATO-së në Ankara, kryeministri Edi Rama ka...

Qeveria rriti me 108 milionë euro buxhetin për mbrojtjen e vendit

9 Korrik 2026, 13:20, Ekonomi CNA

Në rishikimet e buxhetit të vitit 2026, Buxheti i Ministrisë së Mbrojtjes është rritur ndjeshëm krahasuar me planifikimin fillestar, me pjesën dërrmuese të fondeve shtesë të orientuara drejt programit, “Forcat e Luftimit”.

Sipas të dhënave zyrtare fondet totale të Ministrisë së Mbrojtjes janë rritur nga rreth 58.95 miliardë lekë në 69.23 miliardë lekë. Shtesa arrin në 10.29 miliardë lekë, ose 17.4% më shumë krahasuar me buxhetin fillestar.

Rritja më e madhe në vlerë absolute është regjistruar në programin “Forcat e Luftimit”. Financimi i këtij programi është rritur nga 31.39 miliardë lekë në rreth 40.4 miliardë lekë, me një një shtesë prej më shumë se 9 miliardë lekësh.

Në terma përqindjeje, buxheti për Forcat e Luftimit është zgjeruar me 28.7%. Rreth 88% e gjithë shtesës së akorduar për Ministrinë e Mbrojtjes është përqendruar pikërisht në këtë program, duke treguar se forcimi i kapaciteteve luftarake përbën prioritetin kryesor të rishikimit buxhetor.

Pas ndryshimeve, programi “Forcat e Luftimit” përfaqëson rreth 58% të gjithë buxhetit të Ministrisë së Mbrojtjes. Rritja e fondeve pritet të krijojë më shumë hapësirë për investime në pajisje, armatim, teknologji, infrastrukturë dhe rritjen e gatishmërisë operacionale.

Edhe programi “Mbështetja e Luftimit” ka përfituar financim shtesë. Buxheti i tij është rritur nga 11.16 miliardë lekë në 12.03 miliardë lekë, ose me rreth 877 milionë lekë. Në terma relativë, rritja është 7.9%.

Rritja më e lartë në përqindje është regjistruar në programin “Planifikimi, Menaxhimi dhe Administrimi”. Fondet për këtë program janë shtuar me 1.1 miliardë lekë, duke arritur në 2.62 miliardë lekë, ose 72.9% më shumë se planifikimi fillestar.

Në drejtim të kundërt ka lëvizur financimi për arsimin ushtarak. Buxheti i programit “Arsimi Ushtarak” është ulur nga rreth 1.76 miliardë lekë në 1 miliard lekë. Shkurtimi arrin në 754 milionë lekë, ose 42.9%. Shkurtimi për këtë zë vjen në një kohë kur forcat e luftimit janë në emergjencë për specialist. Shumë pajisje dhe makineri që po blihen nuk po mund të përdoren për shkak se punonjësit aktuale nuk kanë njohuritë të mjaftueshme.

Mbështetja për shëndetësinë në ushtri me ndryshimet buxhetore është rritur lehtë, me 50 milionë lekë, duke e çuar fondin total në rreth 2.18 miliardë lekë. Ndërkohë, fondet për mbështetjen sociale të ushtarakëve, në nivelin 5.2 miliardë lekë, dhe ato për emergjencat civile, prej 5.79 miliardë lekësh, kanë mbetur të pandryshuara.

Në këtë kontekst, rishikimi i buxhetit dhe përqendrimi i fondeve te Forcat e Luftimit përbëjnë edhe një sinjal politik ndaj aleatëve se Shqipëria po përpiqet të përshpejtojë përmbushjen e angazhimeve të saj./ Monitor

Qeveria rriti me 108 milionë euro buxhetin për mbrojtjen e vendit