Mbyllet me zhgënjim ndeshja e Ballkanit, Sivasspor fiton me përmbysje

2022-10-14 00:02:00, Sport CNA

Duhej të ishte një festë në stadiumin Fadil Vokrri dhe në fakt Ballkani i gëzoi tifozët me golin e Thaqit në pjesën e parë. Por, pjesa e dytë nuk ishte ndër më të mirat për mënyrën e interpretimit nga vendasit që shpërdoruan disa mundësi të mira dhe më pas në harkun e nëntë minutave pësuan dy gola që sollën përmbysjen e miqve për të fiksuar shifrat në rezultatin 1-2. Ballkani mbetet i fundit në Grupin G të Conference League dhe ndërlikon rrugën e kualifikimit.

Sa i takon pjesës së parë, të besuarit e trajnerit Ilir Daja e nisën disi si të ngurtë sfidën, megjithatë me kalimin e minutave vendasit morën frenat e lojës në dorë. Shansi i parë i takoi Rrahmanit që nga fare pranë portës nuk u kordinua siç duhej duke e dërguar topin shumë larg kuadratit. Pas tre minutave ishte Dellova që provoi nga distanca, por portiere Vural u përgjigj në mënyrën e duhur. Megjithatë, gardiani i turqve u dorëzua në golin e shënuar nga ana e Armend Thaqit.

Anësori goditi tokazi dhe mposhti Vural që mund të bënte më tepër. Momenti i mirë për Ballkanin vijoi, por Krasniqi u ndal në minutën e 43-të nga Vural ndërsa në të 45-tën, Goutas shpëtoi skuadrën e tij nga një pasim në zonë i Rrahmanit. Me rezultatin 1-0 u mbyll pjesa e parë, ndërsa fraksionin e dytë, Ballkani e nisi aty ku mbylli 45-minutat e para, në sulm. Rasti më i mirë iu shfaq Krasniqit në një kundërsulm, por sulmuesi u tregua egoist duke mos pasur ndërsa u ndal nga Vural. Në vazhdim, Zyba dhe Korenica provuan nga distanca por pa ia dalë të gjenin rrugën e rrjetës. Nga minuta e 60-të, Sivasspor rriti ndjeshëm ritmin dhe në të 72-tën gjeti golin e barazimit pas një goditje me kokë të Hakan.

Nëntë minuta më pas, turqit goditën sërish këtë herë me Angielskën që devijoi saktë në rrjetës e Frashërit një top në brendësi të zonës. Ballkani provoi të reagonte, por miqtë rezistuan dhe në fund dolën me tre pikë nga stadium “Fadil Vokrri”.

Pas kësaj disfate, Ballkani renditet në vendin e fundit të Grupit G në Conference League me katër pikë pas katër ndeshjeve të luajtura, ndërsa Sivasspor merr kreun pasi prek kuotën e shtatë pikëve. Gjithsesi, në dy ndeshjet e ardhshme, sërish Ballkani do të luaj gjithçka për gjithçka pasi edhe Slavia Pragë është në kuotën e katër pikëve, ndërsa Cluj është shtatë sa Sivasspor. Ndeshja e radhës për Ballkanin është ajo ndaj Slavia Pragë, sërish në “Fadil Vokrri”.