“Pse jo Daja, Josa ose Bushi?!”, Duka për trajnerin e ri: Të mos i harrojmë arritjet e Rejës te Shqipëria

2022-10-13 14:44:51, Sport CNA

“Pse jo Daja, Josa ose Bushi?!”, Duka për trajnerin e ri:

Presidenti i Federatës Shqiptare të Futbollit, Armand Duka, ka folur për trajnerin e ardhshëm të Shqipërisë.

Duka deklaroi se do të respektohet kontrata e trajnerit Edoardo Reja dhe më pas do të merret një vendim. Ai kërkoi që të mos harrohen arritjet e trajnerit Reja në drejtimin e Shqipërisë.

"Trajneri Reja ka një kontratë deri në fund të nëntorit. Do ta respektojmë atë kontratë. Padyshim që do të ulemi të bisedojmë me të dhe nëse do të kemi apo jo një rinovim për edicionin e ardhshëm. Do të bëjmë bilancet bashkarish. Është një trajner me eksperiencë, është një burrë 77 vjeç e 2-3 ditë dhe ka arsyen e logjikën e plotë për ta arsyetuar bashkë me ne, nëse duhet ta rinovojmë këtë kontratë ose jo. Ajo që është e rëndësishme është që Edi Reja ka dhënë një kontribut të rëndësishëm në zhvillimin, apo progresin në ekipin Kombëtar. Padyshim që shumë nga tifozët, ose shumë nga opinionet nuk janë kënaqur ose nuk kanë arritur pritshmëritë me edicionin e fundit të Ligën e Kombeve. por duhet ta kemi memorien pak më të gjatë. Me në krye Edi Reja në ekipin Kombëtar ka dalë në vend të parë në Ligën e Kombeve, në Ligën C.

Tani në Ligën B padyshim që gjërat do të ishin më të vështira, sepse është një nivel më lartë. A kishim mundësi për të arritur më shumë? Po, kishim. Duhet të kishim dhe më shumë fat. Duhet të kishim dhe më pak mungesa. Por dhe vendi i tretë në eliminatoret e Botërorit, në drejtimin e Rejës. 18 pikë në kualifikueset e Botërorit nën drejtimin e Rejës. Në historinë e Shqipërisë nuk i kemi grumbulluar kurrë edhe kur morëm pjesë në EURO 2016. Nëse shohim nga sot dhe para 3 vitesh, ka më shumë se 7 futbollistë në fushë, që nuk kanë qenë kështu. Kështu që ky bilanc duhet të bëhet në fund të kontratës. Duke parë dhe dëshirën e tij. duke parë dhe kundërshtarët në Europian, do të marrim dhe vendimin më të mirë për ekipin Kombëtar. Ajo që duhet të mendojmë është ekipi Kombëtar dhe asgjë tjetër.", u shpreh Duka.

I pyetur për një trajner shqiptar, Duka përmendi emra si Ilir Daja, Mirel Josa dhe Alban Bushi, por shtoi se këto emra do të vihen në diskutim në FSHF.

Në lidhje me zërat për Di Biagio, ai tha se italianit i është ofruar më parë roli i drejtorit sportiv.

"Di Biagio? I kemi ofruar dikur postin e drejtorit teknik në Federatë, kemi biseduar me të në ditën e finales së Konferencë Ligës në Tiranë dhe për këtë arsye emri i tij është lakuar si trajner. Realisht ne nuk kemi kontaktuar asnjë trajner tjetër për edicionin e ardhshëm.

Trajner shqiptar? Pse vetëm Ilir Daja? Mund të jetë Ilir Daja, mund të jetë Mirel Josa, mund të jetë Alban Bushi, ka shqiptarë të aftë. Të gjithë këto do të vihen në diskutim në Federatë dhe do të dalin me propozimin më të mirë.", deklaroi Duka.