Fiks Fare/ Prej 4 muajsh aparatura e thërrmimit të gurëve në veshka nuk punon

1 Mars 2023, 21:03, Denoncim CNA

Fiks Fare/ Prej 4 muajsh aparatura e thërrmimit të gurëve në

Fiks Fare ndoqi ankesën e një qytetareje 47 vjeçare, paciente e cila vuan prej gurëve në veshka. Ajo ngriti shqetësimin se aparatura që bën të mundur thërrmimin e gurëve në veshka në QSUNT prej 4 muajsh nuk punon.

Në tetor të vitit të shkuar pranë pavionit të Urologjisë zonjës i është implantuar një stent, të cilën duhet ta mbajë në trup gjatë gjithë periudhës që duhet të kryej proçedurën e thërrmimit të gurëve nëpërmjet metodës ESWL.

Pacientja duhet të kryej periodikisht seancat deri në përfundimin e trajtimit pranë Klinikës 2 të kirurgjisë pranë QSUNT – së. Në muajin tetor ka kryer 2 seanca dhe në seancën e radhës i kanë thënë që kjo aparaturë është prishur.

Që prej muajit nëntor të vitit 2022 e deri më tani kjo aparaturë nuk funksion. Pacientja ka kërkuar vazhdimisht informacion dhe përgjigja e vetme ka qenë , që po punohet për t’u rregulluar.

“Kam probleme të shumta prej stent-ës, kam dhimbje dhe nuk e di se çfarë do bëhet dhe sa kohë do më duhet ta mbaj. Privatisht nuk kemi mundësi. I jam drejtuar emisionit tuaj që të na ndihmoni se ju jeni shpresa jonë e vetme” shprehet zonja .

Fiksi i drejtohet Klinikës nr 2 për të marrë informacion mbi aparaturën ‘Lithotripter’ nëse është apo jo në funksion dhe prej sa kohësh ajo është e prishur. Por përveç rojes gazetarët nuk gjejnë personel. Roja pohon se çdo ditë vijnë pacientë që interesohen por aparatura ishte prishur prej shumë kohësh dhe sipas tij ende nuk është rregulluar.

Roja i drejton gazetarët tek pavioni i Urologjisë për të marrë një informacion më të detajuar. Por edhe aty marrin përgjigje nga kryeinfermierja se është duke u punuar për rregullimin e aparaturës.

Pas denoncimit dhe përgjigjeve ndaj qytetares, Fiks Fare iu drejtua me një kërkesë zyrtare Qendrës Spitalore Universitare “Nënë Tereza”. Ky spital pranoi se kjo pajisje nuk funksionon prej më shumë se 4 muajsh. Madje, në përgjigje thuhet se pajisja mjekësore ‘Lithotripter’, me anë të së cilës trajtohen pacientët me kalkuzë renale, ka pësuar një defekt në vitin 2022.

Më tej, QSUT-ja pohon se ka marrë masa të menjëhershme dhe pa vonesa për riparimin dhe rikthimin në gjendje pune të pajisjes, duke bërë edhe tenderin e radhës. Objekti i tenderit ka qenë ‘riparim i pajisjes mjekësore Lithotripter’. Megjithatë, në këtë përgjigje, spitali saktëson se procedura është në fazat e lidhjes së kontratës, duke pranuar se ende nuk është bërë riparimi i pajisjes. Në fund shton se vetëm pas riparimit do të vijohet me ofrimin e këtij shërbimi ndaj pacientëve që nuk kanë marrë trajtim.

Fiks Fare ka mësuar se Spitali Nënë Tereza ka bërë disa tendera për riparimin e kësaj pajisjeje. Në vitin 2022, sipas këtij dokumenti që po shikoni, është bërë tenderi me objekt “furnizim vendosje kokë goditëse për pajisjen mjekësore Lithotripter”. Vlera e kësaj procedure ka qenë 2.8 milionë lekë.

Në mars të të njëjtit vit, 2022, spitali ka bërë tenderin mirëmbajtje e pajisjeve Lithotripter me vlerë 3 milionë lekë.

Ndërkohë, në vitin 2023, QSUT-ja ka bërë një tjetër procedurë, sërish me objekt “riparimi i pajisjes mjekësore Lithotripter”. Kësaj herë me vlerë 3.8 milionë lekë. Por, procedurat janë zvarritur edhe ende nuk është lidhur kontrata, pavarësisht se pajisja nuk punon prej 4 muajsh.

Pra, për 1 vit QSUNT-ja ka shpenzuar rreth 10 milionë lekë të rinj për mirëmbajtjen e kësaj pajisje, e cila ende nuk është funksionale.

Në të tria rastet, fitues është e njëjta kompani, e cila s’ka pasur asnjë rival në procedurat tenderuese të bëra nga QSUNT-ja.

Megjithëse janë paguar dhe po paguhen para’ për mirëmbajtjen e asaj aparature, pacientët vijojnë të sorollaten nga qendrat spitalore për në QSUNT, duke iu rënduar shëndeti nga dita në ditë!/ tch