web counter
LEXO PA REKLAMA!

SHKARKO APP

App Store
Google Play

E fundit!

x

Rritja e çmimeve të naftës/ Braçe bën opozitarin: Po funksionojnë si kartel

11 Mars 2026, 16:45, Aktualitet CNA

Rritja e çmimeve të naftës/ Braçe bën opozitarin:

Deputeti i Partisë Socialiste, Erion Braçe, ka kritikuar sot në Komisionin e Ekonomisë mënyrën se si po funksionon tregu i karburanteve në Shqipëri, duke e cilësuar atë si një model që favorizon rritjen e çmimeve përmes koordinimit të shoqatave dhe ndërmjetësve të shumicës.

Braçe deklaroi se çmimet e naftës dhe benzinës nuk vendosen sipas tregut, por përmes një mesazhi SMS që arrin në të gjitha pikat e karburantit, ku sipas tij, çmimi më i lartë qëndron në rreth 198-202 lekë për litër dhe ka qëndruar mbi 200 lekë për katër vite me radhë. Ai akuzoi Shoqatën e Hidrokarbureve për funksionimin si një kartel që garanton rritjen e çmimeve.

Ai theksoi gjithashtu se tregu i shumicës po funksionon përmes blerjeve ditore, 10-ditore dhe mujore nga një broker i jashtëm, duke eliminuar parimin e depozitave dhe duke mos reflektuar zhvlerësimin e euros në çmimet për qytetarët.

“Unë vazhdoj të insistoj te tregu i karburanteve, me thënë të drejtën, dhe jo thjesht tek veprimi juaj, por tek modeli i tregut që ata kanë ndërtuar prej katër vitesh, po flas prej katër vitesh. Po, ato janë çmimet dhe janë vendosur me një mesazh. Çmimi i naftës ka ndryshuar dje në orën 16:00 sipas një SMS-je të mbërritur në çdo përgjegjës pike karburanti.

Çmimi është më i lartë tek ato që janë të brenduara, pra çmimi më i lartë është ai 198-202 lekë, që këta e kanë sfidë personale. Kanë katër vjet që e kanë sfidë këtë 202 lekëshin; kur e patën para katër vitesh e kanë sfidë mos ta ulin nën 200 lekë dhe ta çojnë gjithmonë mbi 200 lekë.

E kanë ndryshuar me një SMS dhe unë po përpiqem shumë që ato SMS t’i mbledh dhe t’jua dërgoj dhe, mbi të gjitha, nën diktatin e një shoqate që garanton kartelin, që është Shoqata e Hidrokarbureve. Këto SMS nuk i dërgojnë thjesht drejtuesit e kompanive, por këto SMS, veçanërisht tek pikat e bardha, i dërgojnë zyrtarët e Shoqatës së Hidrokarbureve. Pra Shoqata e Hidrokarbureve funksionon si kartel për të garantuar rritjen e çmimeve në këtë rast.

Ju me të drejtë po monitoroni tregun e pakicës, por problemi është atje ku ju thashë, tek tregu i shumicës. Cili është modeli i tregut që zotërinjtë kanë ndërtuar? Këta nuk blejnë më naftë në bursë; këta blejnë nga një broker që e sjell naftën në territor. Është ky brokeri që vjen dhe e derdh naftën në depozitat e këtyre në periudha të ndryshme kohore dhe këta blejnë dhe shesin me çmimin e ditës që dalin nga depozita. Ky model tregu i ka hequr të gjitha avantazhet e blerjeve afatgjata të sasive të naftës, ose ia ka kaluar këtij brokeri, i cili nuk është entitet tatimor shqiptar dhe nuk është i regjistruar në organet tatimore shqiptare, i cili merr këto përfitime të blerjeve në afatgjatë.

Në bursë sot blen naftë ditore, 10-ditore, 30-ditore, 3-mujore dhe 6-mujore. Sot po të futesh në bursë, blen me këto afate dhe këto blerje në tregun shqiptar i bën ky broker. Madje këta kanë shuar fare parimin që duhet të funksionojë një depozitë.

Dollari është përtokë, pra transaksionet kryhen në dollar. Euro është zhvlerësuar, që është element i rëndësishëm tek çmimi, por kjo nuk është reflektuar sepse ky model tregu nuk e lejon këtë gjë.”, tha ai./ CNA





Lajmet e fundit nga