LEXO PA REKLAMA!

SHKARKO APP

“Mik i madh i Shqipërisë”/ Berisha, një minutë heshtje për ikjen nga jeta të Silvio Berlusconi-t

12 Qershor 2023, 12:18, Aktualitet CNA

“Mik i madh i Shqipërisë”/ Berisha, një minutë

Ish-kryeministri, Sali Berisha, ka reaguar pas lajmit për ndarjen nga jeta të ish-kryeministrit të Italisë, Silvio Berlusconi.

Në një deklaratë për mediat, Berisha është shprehur se Berlusconi ishte shtetari që lartësoi më shumë se kushdo tjetër rolin e Italisë.

Ai e cilësoi atë si mik të madh të Shqipërisë, ndërsa në fund të deklaratës së tij mbajti një minutë heshtje në nderim të kujtimit të Berlusconi-t.

Dielli perëndoi përgjithmonë për Silvio Berlusconi-n.

Silvio Berlusconi, italiani i madh dhe i pavdekshëm, themeluesi dhe udhëheqësi i Forza Italia, ish-kryeministri i shquar i Italisë, shtetari që lartësoi më shumë se kushdo tjetër, rolin e Italisë në Europë dhe botë, simboli i suksesit të inicativës së lirë, miku i madh i kombit shqiptar, mbylli sytë përgjithmonë.

Kombi mik italian është sot në zi dhe së bashku me të, miqtë e Silvio Berlusconi-t në mbarë botën.

Silvio Berlusconi ishte një mik i madh dhe i çmuar i Shqipërisë, i Kosovës, i kombit shqiptar, i PD-së dhe imi personalisht.

Ndarja e tij nga jeta është një humbje e madhe për kombin mik italian, është një humbje e madhe për forcat politike të qendrës së djathtë në Europë dhe në botë.

Është një humbje e madhe për Shqipërinë, Kosovën, të cilat ai i mbështeti dhe në momente kritike me vendosmërinë më të madhe.

U rikujtoj shqiptarëve se 24 vite më parë, kur Kosova digjej në flakët me operacionit ‘Patkoi’, Luani i Apenineve udhëhiqte opozitën italiane.

Por kjo nuk e pengoi të mbështesë qeverinë italiane të majtë të asaj kohe, në vendimin për të autorizuar përdorimin e bazave të NATO-s për bombardimin e regjimit të Millosheviçit.

Në takime të shumta, që unë kam pasur me të në Itali, Shqipëri, Europë, kam ndier nga afër ndjenjat e tij më miqësore për shqiptarët, respektin e tij për kombin tonë.

Me këtë rast, unë duke shprehur mirënjohjen time të pakufishme për miqësinë e tij ndaj meje, ndaj Shqipërisë dhe kombit shqiptar, ndaj PD-së, shpreh ngushëllimet më të ndjera familjes Berlusconi, miqve, të afërmve të Kavalierit të pavdekshëm.

Do ta nderoj këtu me një minutë heshtje, kujtimin e pavdekshëm të mikut të madh, Silvio Berlusconi”, tha Berisha./ CNA

Lajmet e fundit nga