Aksioni i SPAK, reagon Balla: Vijon puna për kapjen e personave jashtë vendit

21 Nëntor 2023, 09:40, Aktualitet CNA

Aksioni i SPAK, reagon Balla: Vijon puna për kapjen e personave jashtë

Taulant Balla, ministër i Brendshëm

Ministri i Brendshëm Taulant Balla ka reaguar për operacionin e një nate më parë ku u arrestuan me urdhër të SPAK, ish-zëvendësdrejtori i policisë së Tiranës, Erzen Breçani dhe disa persona të tjerë.

Në një postim në rrjetin social Facebook Balla shkruan se po vijon puna për arrestimin e personave të tjerë të shpallur në kërkim.

"Dje pasdite dhe gjatë natës Policia Shtetit ka finalizuar një operacion kompleks të goditjes së krimit të organizuar të përshirë në krime kundër personit dhe shpërndarjen e lëndëve narkotike, rezultat konkret i hetimeve profesionale nën drejtimin e Prokurorisë Posaçme kundër Korrupsionit dhe Krimit të Organizuar.

Përgëzoj drejtuesit dhe pjesëmarrësit e Policisë së Shtetit në këtë operacion, për profesionalizmin e lartë dhe mbi të gjitha për sigurinë e plotë të informacionit sensitiv deri në finalizimin e operacionit që çoi në arrestimin e të gjithë personave që ndodhen në Shqipëri. Ndërsa vijon puna për gjetjen dhe ndalimin e personave të tjerë që ndodhen jashtë territorit të Shqipërisë.

Gjej rastin t’i falenderoj dhe përgëzoj prokurorët për besimin dhe bashkëpunimin. Në rrjetën e këtij bashkëpunimi kanë rënë eksponentë të krimit të organizuar, zyrtarë dhe ish-zyrtarë të Policisë së Shtetit si dhe persona të tjerë bashkëpunëtorë me ta.

Ky operacion domethënës është konsolidimi i ngritjes në një nivel tjetër të vullnetit të agjencive tona ligjzbatuese për ta goditur krimin në të gjithë spektrin e tij, në funksion të rendit ligjor në të gjithë territorin.

Sot gjej rastin të rikonfirmoj besimin e plotë se forcimi i bashkëpunimit mes agjencive ligjzbatuese dhe lufta e përbashkët në vetë-pastrimin e Policisë së Shtetit, do ta çojë Shqipërinë në një tjetër nivel të sundimit të ligjit."- shruan Balla.

Një natë më parë u arrestuan pas një aksioni të SPAK, 11 persona mes tyre ish-zëvendës drejtori i Policisë Erzen Breçani, djali i tij dhe shefi i komisariatit numër 6 Dedan Gjoni, si dhe u vu në pranga një tjetër zyrtare e Policisë së Shtetit./CNA