E fundit!

13:55 Aktualitet

Shtyhet afati i skemës kombëtare/ Salla: Në vijim diskutimet për IPARD

Ministri i Bujqësisë, Andis Salla, njoftoi shtyrjen me 10 ...

Koronavirusi prek stafin e Top Media

23 Prill 2020, 08:35, Lifestyle CNA

Situata e pandemisë së koronavirusit në Shqipëri nuk ka lënë mënjeanë as gazetarët. Në një prononcim të bërë së fundi, pra disa ditë më parë nga Instituti i Shëndetit Publik, një nga rastet e raportuar ishte edhe një gazetar, i cili ndodhej sipas deklarimeve zyrtare, në gjendje të mirë shëndetësore.

Por, CNA.al ka investiguar dhe ka shkuar më tej dhe ka zbuluar se një pjesëtar i stafit të Top Medias, më saktë një gazetare është prekur nga Covid-19.

Mësohet se ekspertë të ISHP-së kanë shkuar në Top Media dhe kanë bërë disa teste, disa tampone ndaj stafit, dhe të afërmve dhe bashkëpunëtorëve të gazetares.

Gjithashtu, edhe pjesëtarë të tjerë të stafit, si kameramanë dhe bashkëpunëtorë në këtë televizion, janë testuar për Covid-19.

Këtë e bëri publike dy ditë më parë Eni Vasili, në një intervistë me mjekun Roland Xhaxho, i cili u raportua gati dy javë më parë se ishte prekur nga Covid-19. Dhe për shkak se gjatë kohës që ishte konstatuar i prekur, ai kishte qënë në studion e Top Channel, ishte detyruar një pjesë e stafit që të testoheshin, por kishin dalë negativ.

Rasti i gazetares së Top Medias, është përpjekur të mbahet i fshehtë, ashtu si në të gjithë këtë proces, ku emrat nuk thuhen dhe përpiqet të ruhet një lloj konfidencialiteti për të mos përhapur panik.

Nga ana tjetër, një burim zyrtar i tha CNA.al se gazetarët nuk bëjnë përjashtim nga mënyra se mund të preken apo jo nga Covid-19. Ata për më tepër janë më shumë të ekspozuar.

Por, ajo që bie në sy është fakti se nga gazetarët e terrenit, ende nuk është raportuar asnjë rast, por dhe shumë prej tyre nuk janë testuar ndaj Covid-19.

Ndoshta rasti i gazetares së Top Medias është një sirenë alarmi edhe për kolegët gazetarë dhe stafet që janë të ekspozuar në këtë situatë pandemie, ndaj të cilëve Ministria e Shëndetësisë dhe vetë drejtuesit e mediave duhet të kishin një vëmendje dhe një qasje tjetër, në këtë situatë emergjente, e cila ka prekur në Shqipëri mbi 600 persona dhe ka shkaktuar 27 viktima./ CNA.al