Vetting në politikë?/ Deputetët, vila në bregdet, dublex, makina luksoze e dhjetra apartamente

29 Korrik 2018, 07:13, Aktualitet CNA

Vetingu i nisur në drejtësi po jep sinjale se është në rrugën e duhur. Edhe pse u sulmua fort nga politika dhe shumë pak mendonin se të korruptuarit do prekeshin, deri më tani kanë ikur rreth 17 emra të njohur të drejtësisë, ndërsa kjo listë do të shtohet në ditët në vijim, shkruan gazeta ?SOT?.

Nëse shihen të gjitha seancat dëgjimore të mbajtura nga Komisioni i Pavarur i Kualifikimit, disa emra kanë ikur qoftë për shumë pak lekë që nuk justifikojnë, ndërsa të tjerë janë akuzuar se nuk kanë shlyer tatimet, apo kanë ikur sepse është vënë re se kanë paguar drita në banesa të tjera. Por teksa po shkarkohen gjyqtarë e prokurorë për vlera të vogla, pse nuk ndodh e njëjta gjë me politikanët? Pyetja që shtrohet natyrshëm është: A duhet që pas drejtësisë vetingu të shtrihet dhe në radhët e politikës?

?SOT? pak javë më parë publikoi pasuritë e shumicës së deputetëve dhe rezulton se një numër i madh i tyre kanë miliona euro pasuri, shumë herë më tepër se disa gjyqtarë e prokurorë bashkë. Çështja e vetingut në politikë është prekur disa herë dhe vetë deputetët kanë thënë se çdo vit për ta ka veting, pasi ata e deklarojnë pasurinë. Por vetingu në drejtësi ka nxjerrë disa defekte sa i takon punës së ILDKP, institucioni përgjegjës për kontrollin e pasurisë së zyrtarëve. Ka shumë raste kur ILDKP i ka nxjerrë të pastër gjyqtarët dhe KPK ka gjetur shumë shkelje. Vetë kreu i ILDKP Shkëlqim Ganaj deklaroi në Kuvend se kjo ka ndodhur pasi KPK ka akses të pakufizuar, ndërsa ILDKP jo. Pra kjo mjafton që një veting i ngjashëm të shtrihet dhe në politikë.

Deputetët vazhdimisht kanë sulmuar njëri-tjetrin si të korruptuar dhe lidhur me krimin, por kur vjen puna te pasuria, askush nuk ja përmend njëri-tjetrit, pasi duket se ka një konsensus të fshehtë që kjo pikë nuk diskutohet. Normalisht që të ndodhë vetingu në politikë do duhet akoma më shumë punë, pasi ai në drejtësi po ndodh dhe politika po sulmon shumë ashpër.

Pasuritë e deputetëve

Nëse shohim ndër vite se si ka ndryshuar pasuria e deputetëve, rezulton se bëhet fjalë për shifra me 9 zero. Ka shumë nga ata që kanë miliarda lekë. Më të pasurit rezultojnë deputetët që janë njëkohësisht dhe biznesmenë. Agron Shehaj dhe Tom Doshi kanë më shumë të ardhura, të cilat janë me miliona euro. Pas tyre vijnë emra si Astrit Veliaj, Adnor Shameti dhe Agron Çela, që po ashtu kanë të ardhura të shumta për shkak dhe të bizneseve të tyre. Adnor Shameti dhe Astrit Veliaj kanë nga 27 shtëpi, ndërsa Tom Doshi 15. Po ashtu Monika Kryemadhi ka përfituar 8 apartamente dhe i ka shitur.

Për emra të tjerë si Erjon Braçe, Bashkim Fino, bie në sy se kanë makina të shtrenjta. Në bazë të deklarimeve të pasurisë, në radhët e PD ka shumë milionerë, ku dhe dominojnë llogaritë e shumta bankare dhe investimet në bono thesari. Ndërsa në PS ka makina luksoze, banesa dhe rrugë nga më të ndryshmet të fitimit të parave. Fate Velaj i PS ka deklaruar për shembull 1.2 milionë euro të ardhura nga librat që ka shitur. Askush nuk e vë në dyshim pasurinë e gjithsecilit, pasi ajo mund të jetë vënë në mënyrë shumë të ndershme.

Madje ka emra si Agron Shehaj që këto para i kanë pasur para se të futeshin në politikë. Por raportet ndërkombëtare flasin për korrupsion në nivele deputetësh dhe ministrash. Duke qenë se BE kërkon pastrim rrënjësor nga korrupsioni, duket se lind nevoja që vetingu të prekë dhe Parlamentin apo qeverinë.