E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

“Kullat” e Top Channel

16 Shkurt 2018, 12:59, Aktualitet CNA

Emisioni i mbrëmshëm tek kanali televiziv kombëtar jo vetëm që uli nivelin e trajtimit të tematikave shqetësuese si linjë redaksionale e z. Rakipi, por ngjau më shumë me një kor të mirë orkestruar që nga pjesëmarrësit, tek vetë moderatori. I mbushur me shumë mllef të pashpjegueshëm dhe mungesë të plotë debati argument-kundër argument, dukej se nuk mjaftonte por duheshin shtuar dhe mbushur edhe me pasaktësi dhe madje gafa. Përveç kësaj, ishte qartazi një monolog i trishtë me mungesë të debatit nga panelistë të një mendjeje.

Zj. Liperi, gazetare e vjetër në zanat dhe në trajtimin profesional të çështjeve ekonomike, si ?pa dashje?, ishte e pasaktë në prononcimet e saja në lidhje me mos-kreditimin e bankava ndaj projekteve të real-estate. Zj. Liperi jo vetëm që solli statistika të mangëta vetëm të vitit të shkuar 2017, por që nuk mund ta krahasonte kurresesi me 2018, i cili sapo ka filluar. Patjetër që bankat dhe institucionet financiare do ta kreditojnë zhvillimin e sektorit të real-estate, por duke u fokusuar, si gjithnjë dhe me kujdes, në vetëm ato projekte që janë fizibël (të realizueshme financiarisht, ekonomikisht dhe ligjërisht), ku edhe fitimi është i matshëm dhe risku i ulët.

Një tjetër ?pa dashje? apo mungesë informimi e zj. Liperi ishte edhe tek lehtësirat e hotelerisë me 5 yje. Nuk ka asnjë kuadër ligjor që e mbështet argumentin e gazetares. Ajo çka legjislacioni shqiptar ka më sot është e mirëpërcaktuar vetëm për hotelerinë me 5 yje në zonat turistike, dhe ku Tirana nuk bën pjesë si zonë turistike e ligjëruar.

Sikur nuk mjaftuan këto, por një tjetër ?shkarje? ishte edhe në lidhje me taksën e ndikimit në infrastrukturë për ambjentet zyra, e cila sipas saj është ulur në 4%. E vërteta është se ka pasur një iniciativë nga Këshilli Bashkiak Tiranë, por që nuk ka qenë e suksesshme, dhe kjo taksë për ambjentet zyra ka mbetur në nivelin e 8% sot.

Ndërsa pseudo-shqetësimi i z. Bojaxhi ishte pastërtisht në konflikt të pastër interesi, sepse projekti kaq fort i debatuar dhe në unison, i orkestruar me hipokrizi, mbase i bën hije vetëm apartamentit ku z. Bojaxhi ka banuar. Poooor, ky ndërgjegjësim i një qytetari puritan dhe shqetësim pak i vonuar nuk ishte aspak kur pallati ku banonte z. Bojaxhi u ndërtua dhe kur u bënte hije banesave përreth. Atëherë nuk iu dhimbsën, tani i vjen gjynah për ta, ka diçka që nuk shkon, por arsyet i di vetëm ai. Pak hije projekti i kullës mund t?i bëjë atij apartamenti, por mungesa e këtij shqetësimi në të shkuarën ka mospërputhje. Patjetër që projekti i kullës tek ish-7 xhuxhat do të bëjë hije, si të gjitha objektet mbi sipërfaqe, por vetëm për pak hije tek apartamenti i tij, nuk shkon.

Ndërkohë që z. Bojaxhi në fakt nuk duhet të jetë as pjesëtar i paneleve të debateve në lidhje me biznesin, sepse është qartazi në konflikt interesi, e sidomos kur vjen radha e anatemimit të bizneseve të ngjashme me të tijin.

Vetë emisioni, kryekëput, ngjau më shumë me një mllef të pronares së televizionit TCH kundër konkurrentëve të vet, TV Klan dhe Vizion+, të cilët kanë aktivitete ekonomike të diversifikuara edhe në fushën e ndërtimit. Në këtë kuadër, mbase do të ishte me interes të prisnim nëse vetë moderatori i këtij emisioni shumë të ndjekur nga audienca, z. Ylli Rakipi, do të bënte një emision të ngjashëm kushtuar ri-kioskizimit të Tiranës. E pabesueshme në këto kushte që ai është, por kjo temë mbetet me interes të lartë për opinionin publik.

Roli korist i orkestruar i vetë moderatorit Rakipi linte shumë për të dëshiruar, sidomos nëse sillet në kujtesën e lexuesve dhe publikut shqiptar se vetë z. Rakipi është ndërtues i madh, madje me pallat shumëkatësh në zonën e tejlakmuar të ish-Bllokut. Për të përmendur ka shumë, por mbeten akoma për analizë pretendimet për abuzime në privatizimin e pronave publike për këto pallate, e madje-madje, edhe përfitime (lexo: zaptime) të dyshuara nga vetë sipërfaqet e oborreve të shkollave publike. Gjithsesi, mbetemi në pritje nëse vetë organi i prokurorisë do të hapë çështje për këto pretendime të shumë anëshme.

Patjetër që argumenti pro ose kundër ndërtimit të kullave të larta në Tiranën metropol qëndron. Ama nëse do të krahasonim metropolet për të cilat aderojmë dhe ku bëjmë turizëm, si Londra apo Parisi, shohim që jo vetëm janë të mbushura me kulla të larta, por madje vazhdojnë dhe ndërtohen të tilla. Patjetër që ky argument, në rradhë të parë, është përgjegjësi e qeverive vendore dhe qëndrore, të cilat janë votuar, dhe nëse metropoli ynë Tiranë do të duhej të qe më i bukur dhe më i përmirësuar se ato, patjetër që po.

Pas këtij reflektimi post-emision, nuk dimë nëse debate të tilla të stisura dhe të orkestruara, plot gafa, pasaktësi, konflikte interesi dhe kobure të mbushura, shërbejnë më shumë për ndërgjegjësimin e opinionit publik apo dezinformimin e tij dhe presion gjetkë. Qytetari sot nuk ha bar, por nga halli i duhet t?i shohë edhe këta në pritje se dikur do të ndryshojnë sadopak (të paktën në seriozitet dhe saktësime.)/ CNA.al