Ilir Meta braktis Ramën/ Koalicion me Dulen, pret Ben Blushin

8 Shkurt 2017, 17:15, Aktualitet CNA

Kreu i LSI, Ilir Meta, nuk i ka dhënë ende një përgjigje ftesës së kryeministrit për koalicionin parazgjedhor të 18 qershorit, megjithëse disa herë ka deklaruar data të ndryshme, siç ishte koha e zgjedhjes së kryetarit apo konventa e dhjetorit.

Meta ka refuzuar shpesh herë të përgjigjet mbi fatin e koalicionit, me pretendimin se do të jenë forumet e LSI ato që do zgjedhin vazhdimësinë ose jo të bashkëpunimit me PS. Ato janë mbledhur disa herë por kreu i LSI, nuk ka hedhur kurrë në tryezë koalicionin, duke tentuar një tjetër veprim.

Përballë kërkesës të Ramës për qëndrim në koalicion ai ka refuzuar vetëm Bashën, por njerëzit e tij sulmojnë sistematikisht, kryeministrin dhe njerëzit e tij të afërt. Nga ana tjetër LSI ka ?rrëmbyer? flamurin antisoros dhe vetë shpallet si mbështetëse e TRUMP, megjithëse ka qenë gjithmonë një këmbë e Soros dhe mbështetësja e dytë e Klinton pas Ramës.

Ndërkohë që Rama pret një përgjigje, Meta duket se ka nisur ?betejën? për të krijuar një pol të tretë, një koalicion me partitë e vogla me në krye LSI.

Burimet i thanë CityNews se LSI mund të dalë pa Partinë Socialiste në zgjedhjet e 18 qershorit. Partia e Metës kërkon një marrëveshje me Partinë e Vangjel Dules, pas prishjes së këtij të fundit me Edi Ramën dhe afrimit në aleancën qeveritare të PDIU-së

PBDNJ e Dules ka konfirmuar daljen në opozitë, por duket se afrimi me Lulzim Bashën, nuk i jep siguri. Partia që përfaqëson minoritetin grek në Shqipëri, së fundmi po negocion me LSI për të dalë në koalicion parazgjedhor.

Në kuadër të krijimit të një koalicioni sa më solid, duket se Meta i ka hapur dyert edhe Ben Blushit, i cili ka tërhequr pranë vetes mjaft qytetarë të zhgënjyer nga politika 26 vjeçare. Sipas sondazheve, LIBRA e Blushit ka fituar terren dhe pritet që marrë jo pak vota në zgjedhjet parlamentare. Megjithatë, ish-deputeti socialist ende nuk i ka dhënë një përgjigje Ilir Metës për bashkëpunim.

CityNews ka mësuar se LIBRA po kryen vlerësimet e fundit për të vendosur nëse do të dalë e vetme në zgjedhjet e 18 qershorit apo në koalicion. Deri sa të merret vendimi, Ilir Metës i mbetet vetëm të presë.

Konsolidimi i një koalicioni të tretë me në krye LSI, do të çojë në një rrugë të re, e cila do të krijojë një pol të tretë në fushën politike të vendit. Kreu i LSI tashmë ka një bast publik dhe lëvizja e tij e fundit ka si qëllim final zgjedhjen e tij kryeministër i vendit, pse jo edhe me votat e PD së Lulzim Bashës që do të ishte e gatshme të bënte gjithçka për të rrëzuar Edi Ramën./CityNews