Luçiano Boçi: Dështimi në arsim, arritje për Ramën

1 Nëntor 2016, 19:53, Aktualitet CNA

Deputeti i Partisë Demokratike, Luçiano Boçi, ka akuzuar kryeministrin Edi Rama se po përpiqet të bindë qytetarët që dështimi i reformës në arsim është arritje.

Përmes një postimi në rrjetet sociale, Boçi shprehet se proçesi i pranimeve në arsimin e lartë, prodhoi një katrahurë. Ai thekson se maturantët janë tallur, sorollatur dhe dërguar në degë që nuk i kanë dëshiruar. Sipas tij, Rama është sinonim i dështimit dhe i mashtrimit.

Postimi i Boçit

Rama, në pothuaj të gjitha daljet e tij publike, po na rreket të na bindë që dështimi i thekshëm i reformës së tij në arsim, me pranimet e maturantëve, ishte arritje!?
Madje dhe kur flet për dështimet në bujqësi, nuk i del nga mendja “gropa” në Arsim.
Në të vërtetë, e vetmja arritje këtu është që më në fund, maturantët shpëtuan nga fazat e shfazuara të Ramës.
Nuk ka më! Aleluja!!!
Po nuk mbaroka këtu!
I duhet të dëgjojnë tani dhe shfazimet e vetë Ramës.
Pavarësisht kësaj, Rama e di mirë se proçesi i pranimeve, prodhoi një katrahurë ekzemplare, siç ka qef ai ta thotë: e tillë që nuk është parë asnjëherë në këto 25 vite. Nga ato që vetëm ai dhe Ministrja e tij prodhojnë.
I zhveshën maturantët nga rregullat me të cilat ndërtuan mesataren e tyre, duke ia ndryshuar pa asnjë vrarje ndërgjegje.
As i informuan. As i pyetën. As i këshilluan. As i konsideruan familjarët e tyre. As i lejuan të tregojnë aftësinë e meritën. As patën ndjeshmërinë më të vogël për dëshirat e preferencën e tyre.
Përkundrazi.
I tallën, i sorrollatën, i trysnuan, i çuan kuturu në degë të padëshiruara.
Donin të mbushnin me ta klintelat “e varfra”.
I varën në qafë VKM-ra e udhëzime më shumë se idiote dhe në fund prodhuan çfarë?
Një lëmsh universitar të paparë, ku degë të kërkuara nuk plotësohen dot, mgjs mijëra të rinj janë sot rrugëve.
Kur kutotat bosh sot janë me mijëra (4500) dhe po me mijëra janë maturantët që enden rrugëve si gjah i mirë për trafikantët, krimin e drogën.
Ku degë shumë të mira mund të mbyllen, ndërsa perspektiva e shumë të rinjve, pa filluar ende, duket e mbyllur.
Ku madje, ka dhe Universitete që mund të mbyllen.
I fshehu kuotat e privatit, siç ka bërë përherë me hajninë e tij dhe procesin e degradoi drejt institucioneve ekstra ligjore, siç ia theksuan dje përfaqësuesit e Universiteteve.
Guxon e na flet për autonomi!?
Ngatërron vendin me kuvendin dhe i lavdërohet gjindjes me pyetjen:
“A e imagjinoni një të ri me mesatare nën 6 të vazhdojë Universitetin?”!
Cfarë kllounade që prodhon?!
Që të ndricohet se kë quan sukses vetë Rama, le të rrëfejë, se sa është mesatarja e shkollës së mesme e Grupit të tij Parlamentar dhe atyre që i ka zgjedhur Kryetarë Bashkish.
Pastaj t’i tregojë atyre mesataret e fëmijëve e maturantëve.
Ndërkohë po i kujtoj që këtë vit, në masterat e tij shkencorë e profesionalë, një pjesë e madhe e të regjistruarve, janë me mesatare 5.
Kjo është e vërteta.
Pak e gjatë, por tronditese.
Rama duhet të ulë kokën.
Është sinomim i dështimit dhe i mashtrimit!