Ekskluzive-SKANDALI/ Durrës-Kukës dhe koncensioni korruptiv që grabit taksat e shqiptarëve

22 Tetor 2016, 08:39, Aktualitet CNA

Rruga Durrës-Kukës po kthehet në gropën e korrupsionit dhe vjedhjeve që qeveria bën ndaj qytetarëve të saj. Së fundmi është shpallur fituesi i koncensionit të segmentit të rrugës Milot-Morinë, një proces që duket të jetë një aferë e pastër korruptive që të çon te zyra e kryeministrit Rama, një aferë korruptive që akuzon KPP-në (Komisioni i Prokurimit Publik), një aferë e qartë korrupsioni që tregon se si një firmë e skualifikuar hyn në një proces ankimimi jashtë afateve ligjore. Ky ankimim i pranohet dhe nga firmë e skualifikuar bëhet fituese e një koncesioni qindra milionë euro. Citynews ka në dispozicion dokumentacionin e plotë të këtij skandali fotot e te cilave jane publikuar me poshte.
Në dokumentacionin zyrtar, KVO (Komisioni i Vlerësimit të Ofertave) ne MInistrine e Transporteve dhe Infrastruktures, shpall fitues një bashkim shoqërish turke, e cila u shpall fituese me 6 firma të komisionit dhe një abstenim, ndërkohë disa shoqëri të tjera, konkurrente në këtë garë, u skualifikuan, duke u mbështetur në procedurën konkurruese, sipas VMK nr.634.
Ajo që bie në sy është fakti se bashkimi i shoqërive fituese, shpallur në KVO, plotëson në çdo detaj kërkesat e ligjit, por pas një procesi ankimimi të dyshimtë pranë KPP-së, i cili emërohet nga kreu i qeverisë , ka ndodhur përmbysja e madhe.
KPP-ja në mënyrë skandaloze ka pranuar një ankimim 5 ditë më vonë se afat ligjor, ka hedhur në erë një procedurë të plotë ligjore nga Ministria e Transportit dhe Infrastrukturës, për të shpallur fitues një bashkim operatorësh, ku shfaqen edhe dy subjektet shqiptare ?Salillari? dhe ?Kastrati?. E para një firmë ndërtimi dhe i dyti që merret me tregtimin e karburanteve dhe së fundmi ushtron aktivitet në disa fusha të tjera, si kompani sigurimesh apo përfaqësimin zyrtar të një kompanie automjetesh.
Nuk e fiton koncensionin një kompani e huaj që garanton një investim 360 milionë euro, por fitues shpallet bashkimi i disa kompanive, ku janë edhe dy të sipërpërmendurat, të cilat ofrojnë si investim për këtë rrugë rreth 70 milionë euro më pak. Ky fakt mjafton për të treguar se KPP ka disa skandale në vendimin e tij që tregojnë se ndryshimi i fituesit mund të ketë ardhur si rrjedhojë e disa miliona eurove të paguara lart e poshtë në zyrat e shtetit. Këto miliona kanë bërë që të pranohet një ankimim jashtë afateve ligjore dhe komisioni të mos marrë parasysh 70 milionë euro investime më shumë.
Ky koncension është një aferë tjetër korruptive në kurriz të taksapaguesve shqiptarë të cilët në fund janë ata që do të paguajnë miliona eurot e investimeve apo të korrupsionit në institucionet shtetërore, për të përmbysur fituesit dhe për të shpallur fituesë klientët e qeverisë. /Citynews