web counter
LEXO PA REKLAMA!

SHKARKO APP

App Store
Google Play

E fundit!

x

INSTAT: Shërbimet rritën ekonominë 3.2%, bie prodhimi

8 Tetor 2016, 14:30, Aktualitet CNA

Të dhënat zyrtare konfirmojnë se kontributin për rritjen ekonomike e kanë dhënë sektori i shërbimeve dhe tregtisë, ndërsa prodhimi ka shënuar rënie. Kjo bëhet e ditur nga INSTAT I cili deklaron se ekonomia u rrit me 3.2 për qind në tremujorin e dytë të vitit, sipas Institutit të Statistikave. Sipas INSTAT, kontributin kryesor në këtë rritje e kanë dhënë degët e ekonomisë, ku tregtia e transportet me 0.7 për qind, sektori i shërbimeve me 0.5 për qind, e ndjekur sektori i komunikacionit me 0.2 për qind dhe aktivitetet e pasurive të paluajtshme me 0.43 për qind. Ajo që bie në sy është se sipas shifrave zyrtare, prodhimi bujqësor dhe peshkimi kanë shënuar rënie, duke dhënë kontribut negativ në rritjen ekonomike me 0.3 për qind. Ndërsa taksat mbi produktet kanë kontribuuar pozitivisht në rritjen ekonomike me 0.72 për qind. Po ashtu kontribut të ulët kanë dhënë në rritjen ekonomike sektori i industrisë nxjerrëse, i cili po vuan uljen e çmimeve në tregjet ndërkombëtare. Konkretisht bujqësia në tremujorin e dytë të vitit 2016 krahasuar me të njëjtin tremujor të një viti më parë, pati një rënie prej 1.48 për qind. Sektori i bujqësisë është një nga kontribuuesit kryesorë për rritjen ekonomike të vendit. Sektori i industrisë pati rritje me 1.40 për qind në tremujorin e dytë të vitit 2016 krahasuar me tremujorin e dytë të vitit 2015, ku ndikimin kryesor në këtë rritje e ka dhënë nëngrupi i industrisë përpunuese. Industria nxjerrëse vazhdon performancën negative duke shënuar rënie me 18.07 për qind krahasuar me tremujorin e dytë të vitit 2015. Sektori i ndërtimit ka shënuar rritje modeste prej 1.81 për qind krahasuar me tremujorin e dytë të vitit 2015, ndërsa shërbimet u rritën me 4.98 për qind dhe komunikacioni u rrit 10.02 për qind. Aktiviteti Financiar dhe i Sigurimit ka shënuar një rritje prej 3.85 për qind në tremujorin e dytë të vitit 2016 krahasuar me të njëjtin tremujor të një viti më parë. Ndërsa aktiviteti i Pasurive të Paluajtshme ka shënuar një rritje prej 8.07 për qind në tremujorin e dytë të vitit 2016 krahasuar me të njëjtin tremujor të një viti më parë. Fondi Monetar Ndërkombëtar dhe Banka Botërore kanë parashikuar që rritja ekonomike deri në fund të 2016­s të jetë 3.4 për qind. Pak ditë më parë, Banka e Shqipërisë publikoi rritjen ekonomike për 3­mujorin e dytë në nivelin 3.2 për qind. /Citynews.al





Lajmet e fundit nga